SQO-da bes kúnniń ishinde 26 mas júrgizýshi ustaldy
PETROPAVL. QazAqparat – Soltústik Qazaqstan oblysynda «Qaýipsiz jol» jedel-profılaktıkalyq is-sharasy ótip jatyr, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, «Qaýipsiz jol» operatsııasy barysynda jergilikti polıtsııa qyzmeti basqarmasynyń qyzmetkerleri mototsıkldi qujatsyz basqarǵan júrgizýshini ustady. Oblys aýdandarynyń birinde turatyn 21 jastaǵy jigit Jumysshy kentinde júrgizýshi kýáliginsiz, eshqandaı qujatsyz júrgen. Mán-jaıdy anyqtaý barysynda mototsıklshi saý bolǵan, kólik óziniki bolǵanymen, resimdelmegen eken.
Zań buzýshyǵa hattama toltyryldy, profılaktıkalyq áńgime júrgizildi. Jalpy «Qaýipsiz jol» is-sharasy bastalǵaly jolda júrý erejesin buzǵan úsh mototsıklshi anyqtaldy.
SQO polıtsııa departamenti bastyǵynyń birinshi orynbasary Qanat Aıtbaevtyń aıtýynsha, jaz kezinde jolda kólik sanynyń artady. Mototsıklder, velosıped pen samokattarǵa kólik júrgizýde tájirıbesi az jastar men jasóspirimder otyrady. Apattardyń aldyn alý maqsatynda oblysta on kún boıy oblystyq «Qaýipsiz jol» jedel-profılaktıkalyq is-sharasy ótkizilip jatyr.
«Qaýipsiz jol» jedel-profılaktıkalyq is-sharasy bastalǵan bes kúnniń ishinde jolda júrý erejesin buzýdyń 2,3 myń faktisi anyqtaldy. Kólikti mas kúıde basqarǵan 26 júrgizýshi ustaldy. Jyldamdyqty asyrǵany úshin 196, manevr jasaý erejelerin buzǵany úshin 74 júrgizýshi jazalandy. Qaýipsizdik beldigin taqpaýdyń 306 fakti tirkelgen, sondaı-aq rólde telefon paıdalanýdyń 225 deregi anyqtaldy.
Jalpy is-sharaǵa kúndelikti 400-den astam polıtseı tartylady. Operatsııa 11 shildede aıaqtalady.
Bıyl SQO aýmaǵynda 80 jol-kólik oqıǵasy tirkelgen, saldarynan 12 adam qaza taýyp, 99-y túrli dárejedegi jaraqat aldy.
