SQO-da bes kúnde esirtkige qatysty 16 quqyq buzýshylyq anyqtaldy

PETROPAVL. QazAqparat – Soltústik Qazaqstan oblysynda tártip saqshylary «Dopıng» atty jedel-profılaktıkalyq is-sharasyn ótkizdi, dep habarlaıdy QazAqparat tilshisi.

SQO Polıtsııa departamenti baspasóz qyzmetiniń málimetinshe, bes kúni ishinde polıtseıler esirtkige qatysty 16 quqyq buzýshylyqty anyqtalǵan.

Petropavldaǵy mekemelerdiń birinde qalalyq polıtsııa basqarmasynyń jedel qyzmetkerleri quramynda psıhobelsendi qospalary bar dári-dármek saqtalatyn seıftiń tehnıkalyq talaptarǵa saı emestigin anyqtaǵan. Endi jaýapty tulǵalar 63 myń teńgege deıin aıyppul tóleýi múmkin.

Tártip saqshylarynyń sózine qaraǵanda, mundaı ákimshilik quqyqbuzýshylyqtar jıi kezdesedi. Osyǵan uqsas jaǵdaı Petropavldaǵy taǵy bir mekemede, Ǵabıt Músirepov aýdanyndaǵy kásiporynda anyqtaldy. Al Ýálıhanov aýdanyndaǵy mekemelerdiń birinde quramynda esirtki zaty bar preparattardyń bos ampýlalary der kezinde joıylmaǵan. Bul da ákimshilik zańnamany buzý bolyp esepteledi.

«Dopıng» jedel-profılaktıkalyq is-sharasynyń bes kúni ishinde zańsyz aınalymnan 94 gramm túrli esirtki zaty alyndy.

Sondaı-aq, tártip saqshylary psıhotropty qospalary bar 2,5 myń tabletkany, dárilik preparattardyń 1,5 myń ampýlasyn jáne 2 lıtr prekýrsordy qoldanystan aldy. Munyń bári zańdy aınalymdaǵy esirtki zattary salasyna qatysty zańnama talaptaryn buza otyryp saqtalǵan eken.