SQO-da bes kólik soqtyǵysqan jol apatynan qaza tapqandar sany tórt adamǵa jetti
PETROPAVL. KAZINFORM — Soltústik Qazaqstan oblysynda Astana — Petropavl tasjolynda bes kólik soqtyǵysqan jol apatynan zardap shekken 57 jastaǵy áıel aýrýhanada kóz jumdy.
Bul týraly SQO densaýlyq saqtaý basqarmasy baspasóz qyzmeti habarlady. Otadan keıin jansaqtaý bóliminde jatqan áıel búgin, 2026 jylǵy 20 qazanda tańerteń qaıtys boldy.
Osylaısha, jol-kólik apatynda mert bolǵandar sany tórt adamǵa jetti. Marqumdardyń barlyǵy Jambyl aýdanyndaǵy balabaqshada jumys istegen.
Esterińizge salaıyq, jol-kólik oqıǵasy 15 qazan kúni tańerteń Taıynsha aýdanyndaǵy Kremenchýg aýylynyń mańynda bolǵan. Úsh jeńil kólik pen eki KamAZ júk kóligi soqtyǵysqan.
Oqıǵa ornynan túsirilgen beınejazbadan bir baǵytta kele jatqan Audi avtokóliginiń KamAZ-dyń artyna kirip ketkenin kórýge bolady.
Bes adam otyrǵan jeńil kólikti artynan ekinshi júk kóligi soqqan. Saldarynan Audi-degi úsh jolaýshy — Jambyl aýdanyndaǵy balabaqshanyń meńgerýshisi men eki tárbıeshi oqıǵa ornynda mert boldy.
Taǵy eki adam, jeńil kóliktiń júrgizýshisi men taǵy bir jolaýshy áıel aýyr halde aýrýhanaǵa jetkizilgen. Dárigerler birneshe kún boıy 57 jastaǵy tárbıeshiniń ómirin saqtap qalýǵa tyrysty. Bes adamnyń ishinen 20 jastaǵy júrgizýshi ǵana aman qaldy.
Apatqa qatysqan ózge kólikterdiń júrgizýshileri zardap shekken joq.
SQO bilim basqarmasynyń málimetinshe, balabaqsha qyzmetkerleriniń sapary jeke maqsatta bolǵan jáne jumys mindetterimen baılanysty emes.
Osy jol-kólik oqıǵasyna baılanysty abaısyzda eki nemese odan da kóp adamnyń ólimine ákep soqqan jol qozǵalysy qaǵıdalaryn buzý deregi boıynsha qylmystyq is qozǵaldy. Qazir tergeý amaldary men sot saraptamalary jalǵasyp jatyr.
Buǵan deıin Astanada Tesla kóligimen soqtyǵysqan júk kóligi kópirden qulap ketkenin jazǵan edik.
