SQO-da benzın men dızel arzandady
PETROPAVL. QazAqparat – Soltústik Qazaqstan oblysynda búgin benzın men dızel otynynyń baǵasy arzandady, dep habarlaıdy QazAqparat tilshisi.
SQO Kásipkerler palatasynyń dırektory Darhan Qalıevtiń aıtýynsha, óńir kásipkerleri eldegi jaǵdaıdy túsinedi. Janarmaıdyń turǵyndar úshin de, kásipkerler úshin de mańyzy zor.
«Keshe Prezıdent Qasym-Jomart Toqaev aýyl sharýashylyǵy taýaryn óndirýshiler úshin kóktemgi egis jumystaryn ótkizý úshin jeńildetilgen baǵamen janar-jaǵarmaıdyń beriletindigin aıtty. Bizdiń jergilikti kásipkerler de qoldaý bildirip, búginnen bastap dızel otynyna baǵany ortasha 7 teńgege, AI-92 markali benzınge 3 teńgege arzandatty. Óńirdegi úsh kompanııa osyndaı sheshimge kelip otyr», - dedi Darhan Qalıev.
Endi turǵyndar «Qazmunaıgaz», «Etalon» jáne «Shelf» kompanııalarynyń janarmaı beketterinen benzın men dızeldi arzan baǵaǵa ala alady.
«Bular - óńirdi janar-jaǵarmaımen qamtyp otyrǵan negizgi kásiporyndar. Biz qalǵan kásipkerler de bul ıgi iske qosylady degen senimdemiz. Buǵan deıin monıtorıng júrgizdik, jarty jyl boıy baǵa tómendemegen», - dedi Darhan Qalıev..
Qazir SQO-da AI-92 markali benzınniń lıtri 155-156 teńgeden, al, dızel – 186 teńgeden satylyp jatyr.
