SQO-da belgili sportshynyń otbasy 23 jastaǵy jigitti quldyqta ustaǵan
PETROPAVL. KAZINFORM – Soltústik Qazaqstan oblysynda tanymal sportshy Aısha Ýálıshannyń otbasy aýylda 23 jastaǵy jigitti 10 aıdan artyq quldyqta ustap kelgen. Qazir osy oqıǵaǵa qatysty qylmystyq is qozǵaldy.
Bul oqıǵa týraly birqatar BAQ-ta jarııalandy. Almaty oblysynyń 23 jastaǵy turǵyny Muqan Negmatov jýrnalısterge qalaı quldyqqa túskeni, qandaı zábir kórip, qalaı qashyp shyqqany týraly aıtyp bergen. Jigittiń aıtýynsha, áıelder kúresi boıynsha Azııa oıyndarynyń qola júldegeri Aısha Ýálıshan jáne onyń otbasy 2023 jyly SQO Ýálıhanov aýdany Jasqaırat aýylyna 500-600 myń teńge jalaqy tóleımiz dep aldap ákelgen. Sportshynyń kúıeýi Álfarabı uryp-soǵyp, qara jumysqa jekken, zorlyq áreketke barǵan.
Qumar oıyndarǵa berilgen er adam Muqannyń jaqyndaryn da aldap, qorqytyp, aqsha alǵan. Jasqaırat aýylyndaǵy Dıas degen jigittiń kómegimen quldyqtan qashqan Muqan Negmanov jáne onyń otbasy qazir halyqtan jáne quqyq qorǵaý organdarynan kómek surap otyr.
SQO Polıtsııa departamenti bul derekti rastady.
«Osy fakti boıynsha qylmystyq is qozǵaldy. Іstiń barlyq mán-jaıyn anyqtaý maqsatynda muqııat tergeý júrgizilip jatyr. Barlyq dálelder men aıtylǵan sózder qoldanystaǵy zańnamaǵa sáıkes muqııat tekseriledi. Sotqa deıingi tergep-tekserýdiń basqa derekteri QR Qylmystyq is júrgizý kodeksiniń 201-babyna sáıkes jarııa etilýge jatpaıdy», - delingen SQO Polıtsııa departamenti baspasóz qyzmeti usynǵan aqparatta.
Buǵan deıin sot sheshimimen Hasan Qasymbaevtyń 2 aıǵa qamaýǵa alynǵanyn jazǵan edik.
