SQO-da «Bastaý Bıznes» jobasyna turǵyndardan ótinimder qabyldanyp jatyr
PETROPAVL. QazAqparat – Soltústik Qazaqstan oblysynda kásipkerlik negizderin tegin meńgertip, kásip bastaýǵa múmkindik beretin «Bastaý-Bıznes» jobasyna ótinimder qabyldanyp jatyr. Kýrstar 26 sáýirden bastap onlaın ótpek, dep habarlaıdy QazAqparat tilshisi.
SQO kásipkerler palatasy baspasóz qyzmetiniń málimetinshe, kásipkerlik negizderin úıretetin «Bastaý Bıznes» jobasyna jumyssyz júrgen adamdar qatysa alady.
«26 sáýirden bastap memlekettik baǵdarlama aıasynda tegin kýrstar bastaý alady. Oǵan qala, oblys turǵyndary, jumyssyzdar, múgedekter, elýden asyp, zeınet jasyna jaqyndaǵandar, jastar, turmysy tómen nemese kóp balaly otbasylardyń ókilderi, aýyl sharýashylyǵy kooperatıvteriniń zeınet jasyna jetpegen ókilderi jáne qonys aýdarýshylar men qandastarymyz qatysa alady. Oqý onlaın ótedi. 21 kúnge shaqtalǵan. Oqý bitirgenderge sertıfıkat beriledi», - deıdi SQO kásipkerler palatasy qarjylaı emes qoldaý bóliminiń sarapshysy Ásel Samaratova.
Jobaǵa qatysýshylar jumyspen qamtý ortalyǵyna ótinish jazyp, jeke kýáliginiń kóshirmesin usynýy kerek. Ortalyq mamandary teksere kele, maqsatty topqa sáıkes kelip jatsa, bilim alýǵa joldama beredi.
«Joldamany alǵannan keıin kýrsqa qatysýshy kásipkerler palatasynyń jaqyn jerdegi fılıalyna kelip keńes alýy qajet. Ol jerde elektrondyq-tsıfrlyq qoltańba arqyly atameken.co saıtynda tirkeledi», - deıdi Ásel Samaratova.
Byltyr SQO-da «Bastaý-Bıznes» jobasy arqyly 938 adam oqyp shyǵyp, 744-i qarjylaı qoldaýǵa ıe boldy. Kýrstan ótken 167 jas kásipker jeńildetilgen nesıege qol jetkizdi. Bul 481,2 mln teńgeniń 152 jobasy. Olar Aýyl sharýashylyǵyn qarjylaı qoldaý qory arqyly qarjylandyryldy. Taǵy 15 jobaǵa Agrarlyq kredıttik korporatsııa arqyly 42,5 mln teńge berildi. Al 577 adam óz isin ashý úshin grant aldy. Jalpy byltyr grant alǵandardyń sany 1,5 myńǵa jýyq. Olardyń ishinde aldyńǵy jylǵa kýrs túlekteri de bar.
