SQO-da «Bastaý Bıznes» jobasy arqyly 1,5 myńǵa jýyq adam óz kásibin bastady

PETROPAVL. QazAqparat – Soltústik Qazaqstan oblysynda bes jyldyń ishinde 8 myńǵa jýyq soltústikqazaqstandyq «Bastaý Bıznes» jobasyna qatyssa, sonyń 1278-i óz kásibin ashty, dep habarlaıdy QazAqparat tilshisi.

SQO kásipkerler palatasy baspasóz qyzmetiniń málimetinshe, «Bastaý Bıznes» jobasy iske qosylǵan 5 jyldyń ishinde 185 myń qazaqstandyq kásipkerlik kýrsynan ótken. Sonyń 8 myńǵa jýyǵy – soltústikqazaqstandyqtar.

«Osy aralyqta jumyssyz júrgen, ózin-ózi jumyspen qamtyǵan 7942 adamdy oqyttyq, olardyń 1278-i keıin ózderiniń bıznes jobalaryn júzege asyrý úshin jeńildetilgen nesıe aldy. Qazirgi ýaqytta tabysty eńbek etip jatyr», - deıdi SQO kásipkerler palatasynyń dırektory Álibek Áshmetov.

Esil aýdanynyń turǵyny Svetlana Egorova kýrstan ótkenderdiń biri. «Bastaý Bıznestiń» arqasynda aýylynda kópten bergi armany – naýbaıhana ashty.

«Men kishkentaıymnan tátti pisirýge qumar boldym, túrli tort, pechene pisirip, týǵandarymdy qýantatynmyn. Eseıe kele naýbaıshy bolamyn dep sheshtim. Naýbaıhana bizdiń otbasylyq bıznes. Munda menen basqa kúıeýim, balam isteıdi jáne kómekshimiz bar. Ulym – aspaz, ol da «Bastaý» arqyly bilimin jetildirdi. Endi ol óz aldyna býrger ortalyǵyn ashýdy armandaıdy. Bul jobanyń arqasynda ol armanyna qol jetkizetinine senimdimin», - deıdi Svetlana Egorova.

Jaqynda kásipkerler palatasynyń janynan «Atameken Qyzyljar» mıkroqarjy uıymy quryldy. Ol arqyly «Bastaý Bıznes» jobasynyń túlekteri óz isterin júzege asyrý úshin jeńildetilgen nesıe ala alady. Qazirgi ýaqytta turǵyndardan jalpy somasy 210,3 mln teńge bolatyn 57 ótinish túsken. Jalpy bul uıym 1 mlrd teńgeniń 238 nesıesin berýdi josparlaǵan.