SQO-da «Bastaý bıznes» túlekterine arnalǵan jeńildetilgen nesıege ótinish qabyldaý bastaldy

PETROPAVL. QazAqparat – Soltústik Qazaqstan oblysynda kásipkerler palatasy janynan «Bastaý bıznes» túlekterine nesıe berý úshin mıkroqarjy uıymy quryldy, dep habarlaıdy QazAqparat tilshisi.

Jańadan qurylǵan mıkroqarjy uıymy «Bastaý bıznes» baǵdarlamasynyń túlekterine, ıaǵnı kýrstan ótkendigin rastaıtyn sertıfıkaty bar jáne óz jobalaryn qorǵaǵan tyńdaýshylardy qarjylandyrady. Nesıe jyldyq 6 %-ben beriledi.

SQO kásipkerler palatasynyń málimetinshe, bıyl «Bastaý Bıznes» baǵdarlamasy boıynsha 892 adam kýrsty oqǵan. Joba aıasynda olar bıznes ıdeıasyn júzege asyrý úshin jumyspen qamtý ortalyqtary arqyly 200 AEK mólsherinde grant alady.

2017 jyldan bastap 4 jyl ishinde SQO-da «Bastaý bıznes» jobasy arqyly 7 myńnan astam adam kásipkerlik negizderin meńgerdi. Olardyń 5135-i jobadan tolyq ótkendigi jaıynda sertıfıkat aldy. Bul túlekterdiń 1,5 myńy búginge deıin qarjylandyrylsa, qalǵandaryna jobalaryn júzege asyrý úshin áli de qoldaý qajet.

Sońǵy jyldary bankter iri qaryz alýshylardy nesıelendirýge baǵyttalǵan. Óıtkeni bankter shaǵyn bızneske nesıe berýden qorqady. Startap-jobalardy qoldaý maqsatynda «Atameken» UKP búkil aımaqtarda mıkroqarjy uıymdaryn asha bastady. Qazaqstan boıynsha shaǵyn kásipkerlikti damytýǵa 22,5 mlrd teńge bólindi, onyń 1 mlrd teńgesi SQO-ǵa berildi.

«Qarjy uıymdarynyń birazy startap-jobalarǵa nesıe bergileri kelmeıdi, aýyldy jerlerdegi kásipkerlerge aqsha bermeıdi. Osynyń barlyǵyn saralaı kele, mıkroqarjy uıymy quryldy. Nesıe alý úshin qoıylatyn negizgi talap - «Bastaý Bıznes» kýrsynan ótti degen sertıfıkat, kepilge qoıatyn múliktiń bolýy jáne bıznes jospar. Bıyl oblysqa osy maqsatqa 1 mrld teńge qarjy bólindi. Ony jyl sońyna deıin ıegermiz degen oıdamyn», - deıdi «Atameken Qyzyljar» mıkroqarjy uıymynyń dırektory Naǵashybaı Qurkenov.

Bıyl baǵdarlama túlekteri, sonyń ishinde aýyl jáne shaǵyn qala turǵyndary 7,2 mln teńgege deıin, al qala turǵyndary 18,9 mln teńgege deıin neıse ala alady.

«Bastaý bıznes» túlekterine arnalǵan jeńildetilgen nesıege ótinish berý úshin aýyl turǵyndary kásipkerler palatasynyń jergilikti fılıalyna nemese tikeleı óz keńesshilerine habarlasa alady. Al Petropavl turǵyndary tikeleı mıkroqarjy uıymyna kelip, ótinish qaldyra alady. Ol Petropavl qalasy, K.Sútishev kóshesi 60 úı, «Kvartal» bıznes ortalyǵynyń 4 qabatynda ornalasqan. Nesıe kez-kelgen kásipti bastaýǵa 6 %-ben 5 jylǵa, al aýyl sharýashylyǵy salasyna qatysty jobalardy júzege asyrý úshin 7 jylǵa deıin beriledi», - deıdi Naǵashybaı Qurkenov.

«Atameken-Qyzyljar» MQU ótinimderdi qabyldap jatyr. Qazirdiń ózinde 80-ge jýyq soltústikqazaqstandyq jeńildetilgen nesıe alýǵa nıet bildirdi.