SQO-da barlyq oqý oryndarynyń basshylary birinshi qabatqa kóshiriledi
PETROPAVL. QazAqparat - SQO-da jazǵy demalys kezeńinde oqý oryndarynyń basshylaryn birinshi qabatqa aýystyrý josparlanǵan, dep habarlaıdy QazAqparat.
«Qyzyljar - adaldyq alańy» jobalyq keńsesi memlekettik mekemelerdiń basshylaryn birinshi qabattarǵa kóshirý, kedergisiz front-ofıster, bek-ofıster, open-space keńistikter qurý boıynsha jumys júrgizýde.
Petropavlda 2 qalalyq polıtsııa bóliminiń ǵımaraty ashyldy. Kezekshi bólim, keń akt zaly, qyzmetkerlerge arnalǵan kabınetter men ashana ornalasqan jańa ǵımarat ýaqyt talaptaryna sáıkes keledi jáne front-keńselerdiń jumysyn qamtıdy. Mundaı ofıster Petropavl qalasynyń №2 sotynda jáne mamandandyrylǵan aýdanaralyq ekonomıkalyq sotynda da ashylǵan, olar bir ákimshilik ǵımaratta ornalasqan.
Memlekettik qyzmet isteri jáne sybaılas jemqorlyqqa qarsy is-qımyl agenttiginiń óńirlik departamentiniń basshysy Elena Stepanenkonyń aıtýynsha, osyndaı front-keńseler birinshi jartyjyldyqtyń sońyna deıin oblystyq sotta jáne Petropavl qalasynyń mamandandyrylǵan ákimshilik sotynda ashylatyn bolady.
«Oblystyń bilim basqarmasymen birge qazirgi ýaqytta balalar úılerin balalardy qoldaý ortalyqtaryna aınaldyrý máselesi qaralyp jatyr. Petropavl qalasynyń barlyq mektepterinde bar arnaıy qurylǵan shottardy demeýshilik qarajatpen tolyqtyrýǵa bolatyndaı smart-bankıng qosymshalary quryldy. Bıyl sáýir aıynda Petropavl qalasynyń №26 mektebi, Best gımnazııasy jáne qazaq mektep-gımnazııasy dırektorlary kabınetterin 1 qabatqa aýystyrdy», - dedi Elena Stepanenko.
Budan basqa departament basshysynyń aıtýynsha, «Qyzyljar - adaldyq alańy» jobasyn júzege asyrý aıasynda Densaýlyq saqtaý basqarmasymen birlesip №3 qalalyq emhanany transformatsııalaý júzege asyrylýda. Densaýlyq saqtaý uıymynyń bazasynda patsıentterdi smart-marshrýtızatsııalaý iske asyryldy jáne elektrondyq kezek iske qosyldy.
Elektrondyq kezekti uıymdastyrý úshin talondardy beretin 2 termınal, aýdıa habarlaýshysy bar 5 ekran ornatyldy. Osy kabınetterde derbes kompıýterler elektrondyq kezekti basqarýdyń baǵdarlamalyq keshenimen qamtamasyz etilgen. Qalalyq emhanalarda eńbekke ýaqytsha jaramsyzdyq paraqtary QR-kodymen tańbalanady.
