SQO-da bapkerdiń sport mınıstrligine qarsy talaby qanaǵattandyryldy
PETROPAVL. KAZINFORM — Gir sportynan jattyqtyrýshyǵa vedomstvo qosymsha syıaqy tóleýden bas tartqan.
Soltústik Qazaqstan oblysynyń mamandandyrylǵan aýdanaralyq ákimshilik soty gir sportynan bapkerdiń QR Týrızm jáne sport mınıstrligine jáne onyń Sport jáne dene shynyqtyrý isteri komıtetine qatysty bergen talap qoıýy boıynsha ákimshilik isti qarady.
Daýly másele 2025 jyly Qytaıdyń Hanın qalasynda ótken gir tasyn kóterýden álem chempıonatynda júldeli úshinshi oryn alǵan sportshyǵa qatysty boldy. Jattyqtyrýshy júlde alǵan sportshynyń jeke bapkeri retinde aqshalaı syıaqy tóleýdi suraǵan.
Bastapqyda jattyqtyrýshyǵa sportshynyń birinshi jattyqtyrýshysy retinde aqshalaı syıaqy tólengen. Alaıda jeke jattyqtyrýshysy retinde qosymsha syıaqy berýden bas tartylǵan.
Jattyqtyrýshy bul sheshimmen kelispeı, QR Týrızm jáne sport mınıstrligine shaǵymdanǵan. Alaıda mınıstrlik te onyń talabyn qanaǵattandyrmaǵan. Osydan keıin jattyqtyrýshy sotqa júgingen.
Sot isti qaraý barysynda jattyqtyrýshynyń sportshyny 2022 jyldan bastap daıyndap kelgenin anyqtady. Bul — sport mektebiniń buıryqtarymen, jattyǵý sabaqtaryn esepke alý jýrnaldarymen, sport mektebiniń jaýabymen jáne sportshyny daıarlaýdyń jeke josparymen rastaldy.
Qoldanystaǵy zańnamaǵa sáıkes, jattyqtyrýshy sportshyny keminde úsh jyl daıarlasa ony jeke jattyqtyrýshy retinde tanýǵa bolady. Al sportshynyń ulttyq quramada bolmaýy nemese qajetti qujattardyń arasynda jeke daıarlaý josparynyń bolmaýy jattyqtyrýshyǵa aqshalaı syıaqy bermeýge sebep bola almaıdy.
Sot budan bólek, jattyqtyrýshynyń ótinishi men shaǵymyn qaraý kezinde ákimshilik rásim talaptarynyń da tıisti deńgeıde saqtalmaǵanyn anyqtady. Atap aıtqanda, istiń mán-jaılary tolyq ári jan-jaqty zerttelmegen. Sonymen qatar Qazaqstannyń Ulttyq gir sporty federatsııasynyń ótinishi boıynsha tólem jasaýdan bas tartýdyń sebepteri tıisti túrde negizdelmegen.
Osyǵan baılanysty sot Komıtettiń aqshalaı syıaqy tóleýden bas tartý jónindegi áreketterin, sondaı-aq mınıstrliktiń shaǵymdy qanaǵattandyrýdan bas tartý jónindegi áreketterin zańsyz dep tanyp, olardyń kúshin joıdy.
Endi komıtet jattyqtyrýshyǵa aqshalaı syıaqy tóleý týraly ótinishti sottyń sheshimimen qaıta qaraýǵa mindetti.
Sot sheshimi ázirge zańdy kúshine engen joq.
Buǵan deıin sport mektebi jattyqtyrýshylaryna tólenetin ústemeaqy ózgergenin jazǵan edik.
