SQO-da bankrottyqqa júgingender kóbeıdi: qansha adam qaryzynan qutyldy
PETROPAVL. KAZINFORM – Soltústik Qazaqstan oblysynda 2023 jyldan bastap bıylǵy qyrkúıekke deıin sottan tys bankrottyq rásimine 8753 adam ótinish berdi.
Óńirde jeke tulǵalardyń bankrottyq rásimine qyzyǵýshylyǵy sońǵy jyldary aıtarlyqtaı artqan.
SQO boıynsha Memlekettik kirister departamentiniń málimetinshe, sottan tys bankrottyq rásimine ótinish bergenderdiń tek 1687-si ǵana bankrot dep tanylǵan.
- Bankrottyqqa ótinish berýshilerdiń basym bóligi belgilengen talaptarǵa sáıkes kelmeıdi. Negizgi sebepterdiń biri - azamattyń menshiginde múliktiń bolýy. Bankrottyqty rásimdeýde ortaq menshiktegi múlik te esepke alynady. Taǵy bir mańyzdy talap - azamattyń bir jyl boıy alǵan nesıesi boıynsha tólem jasamaýy. ıAǵnı qaryzdyń bolýynyń ózi bankrottyq rásimin qoldanýǵa avtomatty túrde negiz bolmaıdy. Keı jaǵdaıda ótinish berýshi men tólem jasaǵan joqpyn ǵoı dep aıtady, biraq, onyń kartasyna túsken qarajat avtomatty túrde alynsa, bul da tólem bolyp eseptelinedi, - deıdi departament basshysynyń orynbasary Talǵat Salkeev.
Mamandardyń aıtýynsha, SQO-da bankrot dep tanylǵan azamattardyń jalpy bereshek somasy 1,2 mlrd teńgeden asty.
Resmı statıstıkaǵa súıensek, SQO-da 2023 jyly sottan tys bankrottyq rásimimen 132 adam, 2024 jyly 168 adam, byltyr 646 adam, al bıyl qyrkúıek aıyna deıin 741 adam bankrot dep tanylǵan. Osy aralyqta sot arqyly 11 adam óziniń tólem qabiletsizdigin rastaǵan.
Budan bólek óńirde 2023 jyldan 2026 jylǵa deıingi kezeńde 20 jeke kásipker bankrot dep tanyldy. Onyń úsheýi bıyl qaryzǵa batqanyn moıyndady.
Buǵan deıin SQO-da kásipkerlerdiń salyq bereshegi 6 mlrd teńgege jýyqtaǵanyn jazǵan edik.
