SQO-da balyqtardyń jappaı qyrylý sebebi anyqtaldy
PETROPAVL. QazAqparat - Saraptama qorytyndysy boıynsha, Soltústik Qazaqstan oblysy Mamlıýt aýdanyndaǵy kólde 6 tonna balyq otteginiń jetispeýinen qyrylyp qaldy, dep habarlaıdy «QazAqparat» HAA tilshisi.
Ótken demalys kúnderi Glýbokoe kólinde balyqtardyń jappaı jaǵaǵa shyǵyp qalǵan fotosy men vıdeosy áleýmettik jelide taraǵan bolatyn.
Orman sharýashylyǵy jáne janýarlar álemi ınspektsııasy basshysynyń orynbasary Marat Esemseıitovtiń aqparaty boıynsha, balyqtar qyrylǵan orynǵa ekologııa departamenti, veterınarııa qyzmeti, orman sharýashylyǵy ınspektsııasy, tabıǵı resýrstar basqarmasy, TJD jáne tabıǵatty qorǵaý prokýratýrasynyń mamandarynan quralǵan vedomstvoaralyq jumys toby jedel jetti.
«Saraptama qorytyndysy kórsetkendeı, Mamlıýt aýdany Glýbokoe kólindegi balyqtardyń jappaı qyrylýy ottegi jetispeýshiligi saldarynan oryn alǵan. Sýdyń quramynda ottegi az bolǵan. Balyqtardan eshqandaı indet tabylmady. Tiri balyqtar da tekserildi, olar da eshqandaı aýrýǵa shaldyqpaǵan», - dedi Marat Esemseıitov.
Anyqtalǵandaı, balyqtar úshin qajetti otteginiń eń tómengi mólsheri - 3 mg/lıtr.
«Ekologııa departamentiniń saraptama qorytyndysy boıynsha, Glýbokoe kólinde muz qabaty erigennen keıin otteginiń mólsheri 0,3 bolǵan. Boljam boıynsha, muz qatyp turǵan kezde onyń mólsheri nólge teń bolǵan. Sondyqtan, balyqtarǵa aýa jetpegen», - dedi «Qazaq balyq sharýashylyǵy ǵylymı-zertteý ınstıtýty» JShS Soltústik bólimshesi zerthanasynyń meńgerýshisi Vıktor Fefelov.
