SQO-da balyqshynyń denesi rezeńke qaıyqtyń astynan tabyldy
PETROPAVL. QazAqparat – Soltústik Qazaqstan oblysynda balyq aýlaýǵa shyǵyp, habarsyz ketken turǵynnyń denesi tabyldy, dep habarlaıdy QazAqparat tilshisi.
SQO tótenshe jaǵdaılar departamenti baspasóz qyzmetiniń málimetinshe, 11 qyrkúıek kúni 61 jastaǵy er adam balyq aýlaýǵa shyqqan.
Týystaryna Mamlıýtka qalasynan alty shaqyrym jerdegi Okýnevo kóline baramyn dep aıtyp ketipti. Alaıda birazdan keıin onymen baılanys úzilgen.
Er adamdy izdeýge bes qutqarýshy jumyldyryldy. Balyqshynyń denesi rezeńke qaıyqtyń astynan tabyldy.
Onyń ústinde kıim bolǵan, janynan qandaı da bir jeke qutqarý quraldary tabylmady. Ólim sebebi anyqtalyp jatyr.
Jalpy shilde aıynda oblystyń sý qoımalarynda 4 er adamnyń máıiti tabyldy. Aralarynda balyqshylar da bar.
