SQO-da balyqshylar qaýipti bolsa da muz betine shyǵyp júr

PETROPAVL. QazAqparat - Soltústik Qazaqstan oblysynda qutqarýshylar tótenshe jumys rejimine kóshti, dep habarlaıdy «QazAqparat» HAA tilshisi.

Tótenshe jaǵdaılar departamenti baspasóz qyzmetiniń málimetine sáıkes, kóktemde kúnniń jylýyna baılanysty oqys oqıǵa bolý qaýpi artady. Qutqarýshylar sýdaǵy qaýipsizdik máselesine erekshe nazar aýdarady. Áýesqoı balyqshylardy muz betiniń juqarǵany da toqtata almaı otyr. Demalys kúnderi olardyń sany óte kóp bolady.

«Eskertýge qaramastan, eń qaýipti jerlerdi tańdaıdy. Kóbinese qutqarý keýdeshelerin kımeıdi jáne shaǵyn aýmaqqa kóp adam shoǵyrlanyp alady», - dep atap ótti baspasóz qyzmetinde.

Petropavldaǵy Esil ózeniniń eń qaýipti aımaǵy - «Vostochnyı bereg» dámhanasynan qalalyq jaǵajaıǵa deıingi mańaı.

Qutqarýshylar qar erıtin kezde muzdyń ústinde júrý qaýipti ekenin balyqshylarǵa túsindirdi, sýdaǵy oqys jaǵdaıda qalaı áreket etý kerektigin úıretti.

«Biz úshin №1 mindet - adamdardyń qaýipsizdigi. Únemi reıd júrgizip, balyqshylarmen sóılesemiz. Mindetti túrde qutqarý keýdeshesi bolý qajet dep aıtamyz», - dedi qutqarý bólimshesiniń bastyǵy Sergeı Cherkasov.

Qutqarýshylardyń aıtýynsha, olar únemi baılanysta jáne táýlik boıy kezekshilik etedi. Esildegi sý deńgeıi sáýir aıynda kóteriledi dep kútilýde. Oblystaǵy ózen-kólderde seńdi jarý jumystary bastalyp ketti.

Avtor: Olesıa Jýkoven