SQO-da balyqshy kóligimen jardan qulap, mert boldy
PETROPAVL. QazAqparat - Soltústik Qazaqstan oblysynda Esil ózenine balyq aýlaýǵa kelgen turǵyn kóligimen jardan syrǵanap ketip, sýǵa batty, dep habarlaıdy QazAqparat tilshisi.
SQO Tótenshe jaǵdaılar departamenti baspasóz qyzmetiniń habarlaýynsha, ótken aptada Qyzyljar aýdanynda eki qaıǵyly oqıǵa tirkeldi. Saldarynan eki adam qaza tapty. Oǵan belgilenbegen jerde sýǵa shomylý jáne qaýipsizdik erejelerin saqtamaý sebep bolǵan.
Qyzyljar aýdany Prıbrejnoe eldimekeniniń mańyndaǵy Esil ózenine balyq aýlaýǵa kelgen turǵyn saqtyq sharalaryn saqtamaǵan. Jeńil kóligin sýǵa jaqyn ákep qoımaq bolǵan ol syrǵanap ketip, sýǵa qulaǵan. Balyqshynyń jansyz denesin jedel-qutqarý otrıadynyń mamandary ózennen alyp shyqty. Taǵy bir oqys oqıǵa maýsymnyń 30-y kúni bolǵan.
«Qyzyljar aýdanynyń Beloe aýyly mańyndaǵy qoldan jasalǵan kólde 1988 jylǵy azamat sýǵa ketti. Ol joldastarymen demalýǵa kelgen eken. Sýǵa sekirgen 31 jastaǵy jigit qaıtyp sý betine shyqpaı, sol jerde mert boldy. Bul oryn sýǵa túsýge arnaıy jaraqtandyrylmaǵan. Ókinishke oraı turǵyndar bizdiń eskertpemizge mán bere qoımaıdy», - deıdi SQO TJD azamattyq qorǵanys ofıtseri Marat Muratov.
Mamandardyń aıtýynsha, sýdaǵy qaıǵyly oqıǵalardyń 70% ishimdik ishýdiń saldarynan bolady eken. Jyl basynan SQO-da 10 adam sýǵa ketse, sonyń teń jartysy mas bolǵan.
