SQO-da balyq qyrylǵan kól sýynyń synamasy neni kórsetti

PETROPAVL. QazAqparat - Soltústik Qazaqstan oblysynda ekologtar men «Qazgıdromet» RMK fılıalynyń mamandary balyq qyrylǵan Pestroe kólinen alynǵan synamalarǵa taldaý jasady, dep habarlaıdy QazAqparat tilshisi.

«Qazgıdromet» RMK fılıalynyń málimdeýinshe, kól sýynan alynǵan synamalarǵa aldymen lastaýshy zattardyń bar-joǵy, sodan keıin alabuǵalardyń qyrylý sebebin anyqtaý úshin zertteý júrgizilgen.

«23 fızıka-hımııalyq kórsetkish boıynsha taldaý júrgizildi. Olar: sýdyń temperatýrasy, sýtegi kórsetkishi, erigen ottegi, OBT5, sýda qalqyǵan zattekter, túsi, móldirligi, ısi, qurǵaq qaldyq, hlorıdter, sýlfattar, gıdrokarbonattar, kaltsıı, magnıı, qattylyǵy, ftorıdter, ammonıı-ıon, nıtrat-ıon, nıtrıt-ıon, fosfattar, jalpy temir, SBBZ, munaı ónimderi. Barlyq kórsetkish boıynsha qazirgi normatıvtik qujattarǵa sáıkes, normadan asý jaǵdaılary anyqtalmady», - deıdi Qazgıdromet» RMK fılıalynyń ókilderi.

Eske sala keteıik, keshe Petropavl mańyndaǵy Pestroe kólinde qyrylǵan balyq jaǵaǵa shyǵyp qalǵan bolatyn.

Ekologtar tasymaldaý kezinde ólgen balyqtar qalqyp kól jaǵasyna shyǵyp qalǵan bolý kerek dep topshylap otyr. Óıtkeni kólge ıelik etýshi jaqynda sý qoımasyna balyqtandyrý sharasyn júrgizgen.

Avtor: Olesıa Jýkoven