SQO-da balyq aýlaýǵa ýaqytsha tyıym salyndy
PETROPAVL. QazAqparat – Soltústik Qazaqstan oblysynda ýyldyryq shashý kezeńine baılanysty balyq aýlaýǵa tyıym salyndy. Erejeni buzǵandarǵa 116 680 teńgege deıin (40 AEK) aıyppul salynady, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, oblysta 20 sáýirden bastap ýyldyryq shashý kezeńiniń bastalýyna baılanysty balyq aýlaýǵa tyıym salynǵan. Esil ózeninde, onyń barlyq salalary men jasandy sýqoımalarynda 20 mamyrǵa deıin balyq aýlaýǵa bolmaıdy.
«Kóktemde oblystaǵy bıologııalyq alýandyqty saqtaýǵa erekshe kóńil bólinedi. Esil ózeni basseıniniń sý qoımalarynda 15 sáýirden 15 mamyrǵa deıin shortan, aqqaıran men kókserkeni, 20 mamyrdan 20 maýsymǵa deıin sazandy, 1 tamyzdan 14 qyrkúıekke deıin gammarýsty, 1 maýsymnan 15 shildege deıin ózen shaıandary aýlaýǵy tyıym salynǵan. Polıtsııa qyzmetkerleri múddeli organdarmen birlesip brakonerlik faktileriniń aldyn alý, ańshylyq jáne balyq aýlaý qaǵıdalaryn saqtaý boıynsha reıdtik is-sharalardy ótkizedi», - deıdi SQO PD tabıǵatty qorǵaý polıtsııasy tobynyń erekshe tapsyrmalar jónindegi aǵa ınspektory Ashat Qojabaev.
SQO-da 15 sáýirden bastap 22 balyq aýlaýshy ákimshilik jaýapkershilikke tartyldy.
«Tabıǵat aıasynda demalýdy unatatyndardan zańnamany qatań saqtaýdy suraımyz. Jeke tulǵalarǵa balyq aýlaý qaǵıdalaryn buzǵany úshin 10-nan 40 AEK, ań aýlaý qaǵıdalaryn buzǵany úshin 5-ten 70-ke deıin AEK aıyppul bar. Aıtarlyqtaı shyǵyn keltirý qylmystyq jaýapkershilikke ákeledi: zańsyz ań aýlaǵany úshin 3 myń AEK mólsherindegi aıyppuldan 6 jyl merzimge bas bostandyǵynan aıyrý jazasy kózdelgen. Balyq resýrstaryn zańsyz aýlaǵany úshin 3 myń AEK 10 jylǵa deıin bas bostandyǵynan aıyrý túrindegi jaza qarastyrylǵan», - deıdi Ashat Qojabaev.
