SQO-da balyq aýlaýǵa barǵan bala sýǵa batyp ketti
SQO tótenshe jaǵdaılar departamenti basqarmasynyń bastyǵy Marat Muratov oqys oqıǵa týraly brıfıngide aıtty.
11 jasar bala Esil aýdany Nıkolaevka eldi mekeniniń mańynda Esil ózeninde sýǵa ketken. Ol balyq aýlaýǵa eresektersiz jalǵyz barǵan eken.
«Balanyń denesin eki saǵattan keıin aýyl turǵyndary taýyp, sýdan alyp shyqty. Jasóspirim sýǵa batyp ketken jerde balyq aýlaýǵa, shomylýǵa bolmaıdy. Jalpy sońǵy 8 jyldyń ishinde óńirde 195 adamnyń ajaly sýdan kelse, sonyń 33-i bala. Kóp jaǵdaıda olar arnaıy jaraqtandyrylmaǵan jerde, eresekterdiń baqylaýynsyz sýǵa túsken.
Bıyl jaz ystyq, turǵyndar áli kúnge deıin sýǵa shomylyp jatyr. Biraq túnde aýa temperatýrasy 13-15 gradýsqa deıin tómendeıdi. Sýdyń ústi jyly bolǵanymen, astynda sýyq. Al bul adamǵa qaýipti», - deıdi Marat Muratov.
Bıyl SQO-da sýǵa 21 adam batyp ketse, onyń altaýy bala. Osyǵan oraı oblystyń sý aıdyndarynda qaıǵyly jaǵdaılardyń aldyn alý maqsatynda TJD mamandary turaqty túrde reıdter ótkizip keledi.
«Polıtseıler, qutqarýshylar reıdterdi jıi ótkizedi. Degenmen qaıǵyly jaǵdaılar tirkelip jatyr. Ótken jylmen salystyrsaq, byltyr 9 adam kóz jumdy. Onyń bireýi bala. Sondyqtan turǵyndardy jáne oblys qonaqtaryn sýda asa saq bolýǵa shaqyramyz. Balalardy qaraýsyz qaldyrýǵa bolmaıdy. Ruqsat etilgen jerde ǵana shomylý kerek. Bıyl sý aıdyndaryna 4 myńnan astam reıd ótkizdik. Oblys boıynsha 1400-den astam jerge sýǵa shomylýǵa tyıym salynady degen belgi ornatyldy», - deıdi SQO TJD bastyǵynyń orynbasary Murat Qanǵojınov.
