SQO-da balyq aýlaý tártibin buzǵandarǵa 1,3 mln teńge aıyppul salyndy
Balyq sharýashylyǵy komıtetiniń Esil oblysaralyq basseındik balyq sharýashylyǵy ınspektsııasynyń málimetinshe, byltyr óńirde zańsyz balyq aýlaýǵa qatysty 149 ákimshilik hattama toltyrylǵan.
«Zań buzýshylyqtardyń 146-sy – QR ÁQBtK-niń 383-babynyń 1-bóligi «qylmystyq jazalanatyn is-áreket belgileri joq balyq aýlaý qaǵıdalaryn, sondaı-aq balyq resýrstary men basqa da sý janýarlaryn paıdalanýdyń basqa da túrlerin júzege asyrý qaǵıdalaryn buzý» boıynsha, úsheýi - QR ÁQBtK-niń 383-babynyń 3-bóligi «tyıym salynǵan merzimde, tyıym salynǵan quraldarmen nemese tásildermen, tyıym salynǵan oryndarda balyq aýlaý qaǵıdalaryn óreskel buzýǵa» qatysty. Jeke tulǵalar úshin 5 AEK-ten 10 AEK mólsherinde aıyppul qarastyrylǵan, zańdy óreskel buzǵan jaǵdaıda onyń mólsheri 20 AEK-ke deıin ulǵaıady», - deıdi oblystyq balyq ınspektsııasynyń memlekettik ınspektory Andreı Lopatskıı.
Osylaısha byltyr balyq aýlaý tártbin buzǵandarǵa 2 mln 406 myń teńgeniń aıyppuly salynǵan, onyń 2 mln 231 myń teńgesi óndirilip alyndy. Brakonerlerden 1 qaıyq jáne ruqsat etilmegen túrli 8 aý tárkilendi. Budan basqa kólderden ıesiz 60 balyq aýlaý qural-jabdyǵy alynǵan.
«Bıyl aıyppul mólsheri 15 myń men 61 myń teńge aralyǵynda. Alaıda zańsyz balyq aýlaýshylarǵa bul toqtaý salmaı otyr. Jyl bastalǵaly beri balyq aýlaý tártibin buzǵandarǵa, zańsyz satý, tasymaldaýmen aınalysqandarǵa 70 ákimshilik hattama toltyryldy. Aıyppuldyń jalpy somasy – 1 mln 329 myń teńge. Onyń 1 mln 114 myń teńgesi óndirilip alyndy. Budan basqa 11 aý tárkilendi, ıesi anyqtalmaǵan 77 balyq aýlaý quraly alyndy», - deıdi Andreı Lopatskıı.
