SQO-da balyq aýlap otyrǵan turǵyndy buqa súzip óltirdi
PETROPAVL. QazAqparat – Soltústik Qazaqstan oblysynda bir kúnniń ishinde jazataıym oqıǵadan eki adam qaza tapty, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, 10 shilde kúni Esil aýdanynda 60 jastaǵy er adam attan qulap mert boldy. Aqjar aýdanynda sımmental buqasy balyq aýlap otyrǵan 67 jastaǵy balyqshyǵa shabýyl jasaǵan. Biraz ýaqytqa maldy ıesiz qaldyrǵan baqtashy qaıtyp kelgende jaraly er adamnyń ústinen shyqqan. Aýyr jaraqat alǵan aýyl turǵyny aýdandyq aýrýhanada qaıtys boldy.
Atalǵan faktiler boıynsha aýdandyq polıtsııa bólimderiniń qyzmetkerleri tekserister júrgizip, saraptamalar taǵaıyndady.
Aqjar aýdanyndaǵy oqıǵa maldy qaraýsyz qaldyrýdyń qaýipti ekenin taǵy da kórsetip otyr. Baqtashy densaýlyqqa zııan keltirýge ákelip soqtyrǵan, mal jaıý erejelerin buzǵany úshin QR Ákimshilik quqyq buzýshylyq týraly kodeksiniń 408-baby 2-bóligi boıynsha jazalandy. Jalpy jyl basynan osy bap boıynsha 1229 hattama toltyryldy.
«Ieleri anyqtalǵanǵa deıin arnaıy qamaý oryndaryna 3225 mal qamaldy. Oblys turǵyndaryn zańnama talaptaryn saqtaýǵa, maldyń erkin baǵylýyna jol bermeýge jáne maldy kútý kezinde saq bolýǵa shaqyramyz», - deıdi SQO polıtsııa departamenti jergilikti polıtsııa qyzmeti basqarmasynyń bastyǵy Aıdyn Baımatov.
