SQO-da balyq aýlaý tártibin buzǵandarǵa byltyr 1,8 mln teńge aıyppul salyndy
PETROPAVL. KAZINFORM — Soltústik Qazaqstan oblysynda balyq sharýashylyǵyna arnalǵan 633 sý aıdyny bolsa, sonyń jartysy kásipkerlerge jalǵa berilgen.
Esil oblysaralyq basseındik balyq sharýashylyǵy ınspektsııasynyń málimetinshe, 295 sý aıdynyn 147 balyq sharýashylyǵy sýbektisi alyp, jumys istep jatyr. Byltyr óńirdegi ózen-kólderge jalpy 115 mln 200 myńǵa jýyq ártúrli balyq shabaǵy jiberilgen.
— Balyq sharýashylyǵyn damytýdyń on jyldyq baǵdarlamasy bar. 2021 jyly iske qosylǵan bul qujat aıasynda 2030 jylǵa qaraı 10 myń tonna taýarlyq balyqqa qol jetkizý josparlanǵan. Baǵdarlamanyń negizgi maqsaty — halyqqa balyq ónimderin qoljetimdi etý, balyq sharýashylyǵy men akvasharýashylyqty damytýǵa qolaıly jaǵdaı jasaý, sondaı-aq balyq resýrstary men sý janýarlaryn saqtaý jáne tıimdi paıdalaný. Baǵdarlama aıasynda balyq jáne óńdelgen balyq ónimderiniń kólemin ulǵaıtý, balyq qoryn qorǵaý jáne ósimin molaıtý, sondaı-aq ǵylymı jáne kadrlyq áleýetti nyǵaıtý kózdelgen, — deıdi ınspektsııa basshysy Nyǵmet Qaýashev.
Mamannyń aıtýynsha, byltyr óńir josparlanǵan 1300 tonna taýarlyq balyqtyń ornyna 1700 tonnasyn ósirdi. Balyq jáne basqa da sý janýarlaryn aýlaýǵa bólingen kvota 942,5 myń tonna bolsa, sonyń 933 myń tonnasy ıgerilgen.
— Balyq sharýashylyǵy memlekettik qoldaýǵa ıe bolyp, búginde kásipkerlerge ınvestıtsııalyq shyǵyndardyń bir bóligin óteý úshin sýbsıdııalar berilip keledi. Sonymen qatar ónimniń sapasy men ónimdiligin arttyrýǵa, asyl tuqymdy balyq sharýashylyǵyn damytýǵa qoldaý kórsetiledi. Salaǵa qatysty jobalardy júzege asyrýǵa 2,5% jeńildetilgen mólsherlememen nesıe beriledi. Budan bólek, salyq tólemderin keıinge qaldyrý, esepke jatqyzylatyn qosylǵan qun salyǵynyń 70% qaıtarý jáne «Damý» qory arqyly kásipkerlerdi qoldaý sharalary qarastyrylǵan, — deıdi Nyǵmet Qaýashev.
Inspektsııanyń basty mindetterdiń biri — balyq qoryn saqtaý. Osy maqsatta byltyr 130 reıdtik is-shara uıymdastyryp, 90 ákimshilik quqyq buzýshylyq anyqtaldy. Nátıjesinde 1,8 mln teńgeden astam aıyppul salyndy.
Mamandardyń aıtýynsha, eń jıi kezdesetin zań buzýshylyqtyń biri — balyq aýlaýǵa ruqsat qujattardyń bolmaýy.
Buǵan deıin «Akvasharýashylyq týraly» zańdy iske asyrý aıasynda balyq óndirýshilerdiń shyǵyndaryn azaıtýǵa, ınvestıtsııa tartýǵa jáne salanyń turaqtylyǵyn arttyrýǵa baǵyttalǵan memlekettik qoldaýdyń jańa keshendi sharalary qalyptastyrylǵanyn jazǵan edik.