SQO-da balasyna durys tárbıe bermegen 50 ata-ana jazalandy
PETROPAVL. QazAqparat – Petropavlda «Balalar profılaktıkasy jáne baqylaý» oblystyq aktsııasy ótip jatyr, dep habarlaıdy QazAqparat tilshisi.
Soltústik Qazaqstan oblysy Polıtsııa departamenti baspasóz qyzmetiniń málimetinshe, ıývenaldyq polıtseıler Petropavldaǵy Vokzal aýdany, «Ýıýt», Kosogor aýdandarynda bolyp, polıtsııanyń esebinde turǵan otbasylardy aralady. Tártip saqshylarymen birge keshki tekseriske qamqorshylyq jáne qorǵanshylyq bóliminiń ókilderi, sondaı-aq volonterler qatysty.
«Esepte turǵan otbasylardy aralaýdaǵy maqsat – ata-analar men olardyń balalary tarapynan jasalatyn jáne olarǵa qatysty jasalatyn qylmystar men quqyq buzýshylyqtardyń aldyn alý. Aktsııa 5-13 tamyz aralyǵynda ótedi. Shara barysynda kámeletke tolmaǵan balalaryn jalǵyz tárbıelep otyrǵan analarǵa, eki otbasyǵa – keńse taýaryn jáne azyq-túlik aparyldy. Profılaktıkalyq áńgime júrgizildi», - deıdi Petropavl qalalyq polıtsııa basqarmasy bastyǵynyń birinshi orynbasary Álibek Ǵabdýllın.
Petropavlda «Balalar profılaktıkasy jáne baqylaý» aktsııasyna 80-nen asa kámeletke tolmaǵandardyń isteri jónindegi ınspektorlar, ýchaskelik ınspektorlar men jergilikti atqarýshy organdardyń ókilderi jumyldyrylǵan. ıÝvenaldyq polıtsııa bólimshesi aktsııa aıasynda «Tyıym salynǵan, jasaýǵa bolmaıtyn» bes qaǵıda» arnaıy jadnama ázirlep, daıyndady. Onda tezıs túrinde balanyń úlken qalada jazataıym oqıǵaǵanyń qurbanyna aınalmaýdyń joly týraly basty usynystar jazylǵan.
Aktsııa bastalǵaly oblys polıtseıleri esepte turǵan 2170 adamdy turǵylyqty mekenjaılary boıynsha tekserdi: onyń ishinde 228-i shartty túrde merziminen buryn bosatylsa, 431-i buryn sottalǵandar, 378-i turmysy tómen otbasylar. Nátıjesinde 24 quqyqbuzýshylyq anyqtaldy. 50 zańdy ókil ákimshilik jaýapkershilikke tartyldy – olardyń bári kámeletke tolmaǵan balalardy tárbıeleý jónindegi mindetterin oryndamaǵandar.
