Infraqurylymnyń tozýynan aýyl sharýashylyǵynda sýdyń 40 paıyzyna deıin ysyrap bolady
ASTANA. KAZINFORM – Taýly aımaqtarda erigen sýlardy jınaý úshin jańa sý qoımalaryn salý nemese muzdyqtardyń erýin jasandy túrde baıaýlatý máselesi qazirgi tańda qarastyrylyp otyrǵan joq. Bul týraly QR SRIM Sý sharýashylyǵy komıtetiniń tóraǵasy Arsen Jaqanbaev Ortalyq kommýnıkatsııalar qyzmetinde málim etti.
Onyń aıtýynsha, klımattyń ózgerýi aıqyn baıqalyp otyr. Halyqaralyq sarapshylardyń boljamyna sáıkes, 2050 jylǵa qaraı jahandyq temperatýra 2–3 gradýsqa deıin kóterilýi múmkin.
– Muzdyqtardyń erýi jáne ony jınaqtaý máselesi búgingi kúni bizdiń mınıstrliktiń tikeleı quzyretine kirmeıdi. Muzdyqtar boıynsha turaqty monıtorıngti «Qazgıdromet» júrgizedi. Al tótenshe jaǵdaılardyń aldyn alý maqsatynda, sel qaýpi tóngen jaǵdaıda ǵana TJM-niń óńirlik departamentteri muzdyqtardyń jaı-kúıin tikushaq arqyly vızýaldy túrde baǵalaıdy. Qazirgi kezeńde iri muzdyqtardy eritip, olardyń negizinde úlken sý qoımalaryn salý – merziminen buryn dep esepteımiz, – dedi komıtet tóraǵasy.
Sonymen qatar Arsen Jaqanbaev Qazaqstandaǵy sý tutyný kólemine de toqtaldy.
Onyń dereginshe, el boıynsha jyl saıyn paıdalanylatyn sýdyń kólemi shamamen 25 mlrd tekshe metrdi quraıdy. Onyń 65 paıyzy aýyl sharýashylyǵy daqyldaryn sýarý alqaptaryna jumsalady. Alaıda ınfraqurylymnyń tozýyna baılanysty sýdyń 30–40 paıyzyna deıingi bóligi ysyrap bolady.
Osyǵan baılanysty sý sharýashylyǵyn basqarý jáne damytýǵa arnalǵan strategııalyq qujattar aıasynda 14,5 myń shaqyrym kanaldardy jóndeý kózdelip otyr. Sonymen qatar qosymsha sý qoımalaryn salý josparda bar. Osyndaı jumystardy kezeń-kezeńimen 2030 jylǵa deıin júzege asyrý josparlanǵan.
– Qarjylandyrý respýblıkalyq jáne jergilikti bıýdjetter esebinen, sondaı-aq halyqaralyq qarjy ınstıtýttarynyń qarajaty arqyly júrgiziledi. Bıyl Ońtústik Qazaqstan óńirinde sý az jyl boldy. Soǵan qaramastan, sýmen qamtýda qıyndyqtar bolǵanymen, birde-bir sharýashylyq egistik alqaptaryn joǵaltqan joq, – dep tolyqtyrdy Arsen Jaqanbaev.
Buǵan deıin Qazaqstan sý qaýipsizdigi salasyndaǵy óńirlik saıasatty nyǵaıtatynyn jazǵanbyz.