SQO-da balany demalys lagerine jiberý baǵasy qansha

PETROPAVL. KAZINFORM — Soltústik Qazaqstan oblysynda osy jazda 65 myńǵa jýyq oqýshynyń 95% túrli demalys túrimen qamtý josparlanǵan.

Desek te, tek qala syrtyndaǵy demalys lagerleri tek 6,2 myń balany ǵana qabyldaýǵa qaýqarly. SQO bilim basqarmasynyń basshysy Aınagúl Suraǵanovanyń aıtýynsha, shamamen 40 myń oqýshy mektep janyndaǵy lagerlerde demalsa, sondaı-aq, kıiz úıler, palatkalar lagerleri qurylyp, sporttyq sektsııalar jumys istemek.

— SQO-da on balalar lageri bar, onyń bireýi Aqmola oblysynyń aýmaǵynda ornalasqan. Maýsymǵa ázirleý úshin 393 mln teńge jumsalady, onyń 25 mln teńgesin senimgerlik basqarýǵa alǵan kásipkerler bóldi. 30 mamyrǵa deıin lagerlerde jóndeý jumysy aıaqtalýy tıis, jazǵy maýsym 6-10 maýsym aralyǵynda bastalady, — dedi Aınagúl Suraǵanova.

Bir maýsym 7-10 kún aralyǵynda bolmaq. Balalar 5 rettik tamaqpen qamtylady.

— Bıyl memlekettik lagerge joldama quny 35 myń teńge, senimgerlik basqarýdaǵy lagerde 60 myń teńge turady. Oblystyń keı sharýashylyqtary jylda aýdandaryndaǵy oqýshylarǵa lagerge joldama syılaıdy. Máselen, Esil aýdanyndaǵy bir kásipker jylda 200 joldama syılaıdy. Jalpy kópbalaly otbasydan shyqqan, jetim jáne ata-ana qamqorlyǵynsyz qalǵan balalar úshin demalys tegin. «Qazaqstan halqyna» qorynyń qarajatyna «Jazdyq joldama» jobasy aıasynda aýyldyq jerden 210 oqýshy Aqmola oblysyndaǵy «Parýs» lagerine demalysqa barady, — dedi basqarma basshysy.

Jazda balalardyń bos ýaqytyn tıimdi ótkizý maqsatynda óńirde bıyl da birneshe aýqymdy joba iske asyrylady. Sonyń biri — Oqýshylar saraıy janynan uıymdastyrylatyn — «Jazǵy akademııa». Balalar úshin túrli úıirmeler jumys isteıdi. «Bir kún qalada» jobasy aıasynda aýyl balalaryna Petropavldyń kórnekti oryndaryna ekskýrsııalar uıymdastyrylady.

Buǵan deıin bıyl jazda «Qazaqstan halqyna» qorynyń qoldaýymen 10 myń bala tegin demalatyndyǵyn jazǵan edik.