SQO-da balalarǵa arnalǵan qymbat MRT apparaty paıdalanýǵa berildi
SQO-da budan bylaı balany MRT apparatyna túsirý úshin uzyn-sonar kezek kútýdiń qajeti bolmaıdy. Oblystyq kópsalaly balalar aýrýhanasyna zamanaýı qondyrǵy ornatyldy. Nátıjesinde dıagnostıka, dıagnoz qoıý sapasy artpaq. «Balalar jyly jáne óńirdi 2022-2026 jyldary áleýmettik-ekonomıkalyq keshendi damytý baǵdarlamasy aıasynda bıyl respýblıkalyq bıýdjet qarajatyna kópsalaly balalar aýrýhanasyna magnıttik-rezonanstyq tomografııa apparaty satyp alyndy. Quny – 791 mln teńge. 1,5 teslalyq, Frantsııada jasalǵan. Búgin osy qymbat qondyrǵy paıdalanýǵa berildi. Mundaǵy MRT qondyrǵysy tek balalarǵa ǵana qyzmet kórsetetin bolady. Buǵan deıin balalardy MRT tekserisinen ótkizý problema bolatyn. Birinshiden arnaıy balalarǵa arnalǵan qondyrǵy bolmady, sondyqtan oblystyq, qalalyq aýrýhanalarda eresektermen birge kezekke qoıylatyn. Balalarǵa kórsetiletin qyzmettiń óz ereksheligi bar jáne 5 jasqa deıingi balalardy qondyrǵyǵa túsirýdiń óz qıyndyǵyn eskerý kerek, óıtkeni, bala qozǵalmaı jatýy tıis», - deıdi aýrýhana dırektorynyń mindetin atqarýshy Nurlan Aımanov. Mamannyń aıtýynsha, qondyrǵyny ornatýǵa bir jyl ýaqyt ketti. Qujattaryn ázirleý, satyp alý, ákelip ornatý – búgin bul jumystardyń bári artta qaldy. Endi zaýyttyń ókili kelip, eki-úsh kún boıy qondyrǵynyń jumysyn rettemek. Erteń alǵashqy naýqasty qabyldaýdy josparlap ta qoıǵan.
«MRT apparaty qaı maqsatta qoldanylatynyn aıtsaq, eń aldymen nevrologııalyq dertteri bar balalarǵa kerek. Máselen nevrologııa bólimshesinen jylyna myńnan astam bala ótedi. Solardyń orta eseppen alǵanda 70 % MRT apparaty kerek. Ortopedııada, keýde qýysy aýrýlarynda, qursaq qýysy, býyn jáne basqa da kóptegen dertterde MRT-ǵa túsirý qajet. 2011 jyly oblysta alǵashqy MRT apparaty oblystyq kópsalaly aýrýhanaǵa alyndy. Balalar da sol jerde ótip keldi. Byltyr óz erekshelikterine qaramastan balalarǵa munda 1600-den asa zertteý júrgizilgen. Sondaı-aq balalarǵa arnalǵan keıbir fýnktsııalardyń bolmaýynan Aqmola oblysyna, Astanaǵa jáne kórshi Reseıge baratyn. Bul qondyrǵy barlyq qajetti optsııamen, baǵdarlamamen qamtylǵan. Onymen naýqastyń jasy men aýrýyna qaramastan aǵzanyń barlyq múshesine zertteý jasaýǵa bolady», - deıdi Nurlan Aımanov.
Bul qondyrǵy eresekterdi de qabyldaı alady, biraq birinshi kezekte basymdyq balalarǵa berilmek. SQO ákimi Aıdarbek Saparov oblystyq kópsalaly balalar aýrýhanasynda bolyp, jańa qondyrǵyny kórdi.
«Aýrýhana dárigerlerine júkteme kóbeımeýi úshin qosymsha maman tartý kerek. Bul qondyrǵy qajet bolsa úsh aýysymmen jumys istesin. Sonda kezek te bolmaıdy. Aqsha bólinip jatyr, qajetti qondyrǵylar alynýda. Sony durys qoldaný kerek. Halyq nátıjesin kórýi tıis», - dedi Aıdarbek Saparov.
