SQO-da balalardyń ınfektsııalyq bólimshesi modýldik aýrýhanaǵa kóshirildi

PETROPAVL. QazAqparat – Soltústik Qazaqstan oblystyq kópsalaly balalar aýrýhanasyndaǵy ınfektsııalyq bólimshe jańa modýldik ınfektsııalyq aýrýhanaǵa kóshirildi, dep habarlaıdy QazAqparat tilshisi.

SQO kópsalaly balalar aýrýhanasynyń málimetinshe, qazirgi ýaqytta bólimsheni jáne onda em alyp jatqan 40 kishkentaı syrqatty kóshirý jumystary júrgizilip jatyr. Balalar enterovırýs jáne túrli ınfektsııalardy, baspa aýrýyn juqtyrǵan.

Modýldik ınfektsııalyq aýrýhana ǵımaratyna kóshirilgen balalar ınfektsııalyq bólimshesi 85 syrqatqa shaqtalmaq. Onyń 75-i ınfektsııalyq oryndar, qalǵany jansaqtaý palatalary bolady.

Buǵan deıin balalar ınfektsııalyq bólimshesiniń qyzmetin atqaryp kelgen ǵımarat eskirgen. Ata-analar tarapynan da nysannyń jaısyzdyǵyna qatysty kóptegen narazylyq, ótinish aıtyldy. Sondyqtan da ǵımaratty jóndegennen góri, paıdalanýǵa eki jyl buryn berilgen modýldik aýrýhanaǵa kóshirý tıimdi dep sheshim qabyldandy.

Kezinde koronavırýs naýqastary úshin salynǵan Petropavldaǵy modýldik aýrýhana 200 orynǵa eseptelgen. Zamanaýı standarttarǵa saı joǵary tehnologııalyq jabdyqtarmen jabdyqtalǵan. Ókpeni jasandy tynystandyrý, ÝZI, rentgen apparattary jáne kompıýterlik tomograf ornatylǵan.

Jańa aýrýhanada naýqastarǵa barlyq jaǵdaı jasalǵan. Ár palatadaǵy tósek oryn ottegige qosylǵan.⠀