SQO-da balalardyń demalys lagerleri 17 maýsymda ashylady
PETROPAVL. QazAqparat – Soltústik Qazaqstan oblysynda balalardyń jazǵy demalys lagerleri 17 maýsymnan bastap ashylady, dep habarlaıdy QazAqparat tilshisi.
Petropavl qalalyq ákimdigi baspasóz qyzmetiniń málimetinshe, balalardyń demalys jáne saýyqtyrý lagerleriniń ashylýy epıdemıologııalyq jaǵdaımen tyǵyz baılanysty bolmaq. Ázirge 17 maýsymǵa josparlanǵan. Lagerler jazdyń sońyna deıin balalardy bes ret qabyldamaq. Maýsym 10 kúnge shaqtalǵan.
23 367 oqýshyny Petropavl mańyndaǵy «Aq qaıyń» men «Dostyq» balalar lagerleri qabyldaıdy. Qazir bul demalys oryndarynda balalarǵa jaqsy jaǵdaı jasaýǵa ázirlik júrgizilip jatyr.
Petropavl qalasynyń ákimi Bolat Jumabekov demalys lagerleriniń daıyndyǵyn óz baqylaýyna aldy. Jaýapty bólimge balalardyń qatysýymen bolatyn jazataıym oqıǵalardyń aldyn alýǵa jáne qaýipsizdikti qamtamasyz etýge tapsyrma berdi. Jazǵy ýaqytta oqýshylarmen jumys isteıtin pedagogıkalyq ujymǵa jáne korpýstardyń sanıtarlyq jaǵdaıyna erekshe nazar aýdarýdy tapsyrdy.
Jalpy, 26 mamyr men 19 maýsym aralyǵynda bilim berý mekemelerinde orta jáne joǵary býyn oqýshylaryna arnalǵan jazǵy mektep jumys istemek. Jumys eki baǵyt boıynsha júrgiziledi: olımpıadalyq rezerv mektebi jáne qashyqtan oqýǵa baılanysty týyndaǵan bilim olqylyqtarynyń ornyn toltyrý. Sabaqtar sanıtarlyq qaýipsizdik normalaryn saqtaı otyryp, offlaın rejımde ótedi.
Buǵan deıin Bolat Jumabekov mekteptegi sport alańdarynyń jaǵdaıyna nazar aýdarǵan edi. Ákim jazataıym oqıǵalardyń aldyn alý úshin árqaısysyn taǵy da tekserýdi tapsyrdy. Qala basshysy sporttyq jarystar men týrnırler ótkizý úshin aýla klýbtarynyń jumysyn uıymdastyrýdy mindettedi.
Sondaı-aq, oblys ortalyǵynda mobıldi toptar qurylyp, quqyq buzýshylyqtardyń, jasóspirimderge qatysty qylmystardyń aldyn alyp, balalardyń qadaǵalaýsyz qalýyn boldyrmaý maqsatynda is-sharalar júrgizedi.
