SQO-da balalardy mektepke deıingi bilimmen qamtý kórsetkishi 98%-ǵa jetti - Sultanov
ASTANA. QazAqparat - Soltústik Qazaqstan oblysynyń ákimi Erik Sultanov «Balarman» balabaqshasynyń ashylýyna qatysty. Ata-analar men búldirshinderdi, tárbıeshilerdi osynaý qýanyshpen óńir basshysy quttyqtady, dep habarlaıdy SQO ákimdiginiń baspasóz qyzmetinen.
Ol 2011 jyldan bastap Qazaqstanda mektepke deıingi tárbıe men bilim berýdi damytýǵa arnalǵan «Bilim berýdi damytýdyń memlekettik baǵdarlamasy» júzege asyrylyp kele jatqanyna toqtalyp ótti. Osy ýaqyt aralyǵynda óńirde 12 312 jańa oryn ashyldy.
«Sońǵy jyldary kásipkerler mektepke deıingi bilim berýge ınvestıtsııa quıyp keledi. Búgingi tańda Petropavl qalasynda 16 jeke menshik mektepke deıingi bilim berý mekemeleri ashylǵan.
Memlekettik-jeke menshik áriptestik atalǵan baǵdarlamany júzege asyrýdyń basty býyny bolyp tabylady. Jeke menshik balabaqshalarda memlekettik tapsyrysty ornalastyrýdyń arqasynda 3-ten 6-jasqa deıingi balalardy mektepke deıingi bilimmen qamtý kórsetkishi 98%-ǵa jetti», - dedi Erik Sultanov.
Sondaı-aq, óńir basshysy mańyzdy áleýmettik jobany júzege asyrǵany úshin «Petrostroı-Lıýks» JShS dırektory, kásipker Nıkolaı Koshıkovqa alǵysyn bildirdi.
«Osynda tárbıelenetin búldirshinder óskende sapaly bilim alyp, Qazaqstan Respýblıkasynyń damýy úshin jasalyp jatqan ıgilikti isterdi jalǵastyra berýin tileımin», - dedi óz kezeginde Nıkolaı Koshıkov.
Jańa balabaqsha 200 balaǵa arnalǵan, onda 27 pedagog jumys isteıtin bolady.
