SQO-da balalardyń jaraqat alýy jıiledi
PETROPAVL. KAZINFORM — Soltústik Qazaqstan oblystyq kópbeıindi balalar aýrýhanasynyń travmatologııalyq pýnktine bıylǵy úsh aıda 2857 bala júgingen. Bul ótken jyldyń sáıkes kezeńimen salystyrǵanda 18,5% artyq.
Óńirlik kommýnıkatsııalar qyzmetinde jaýapty mamandar jazǵy kanıkýldyń bastalýyna baılanysty ata-analardy balalar qaýipsizdigi týraly eske saldy.
Oblystyq kópbeıindi balalar aýrýhanasynyń travmatologi Shyńǵys Nurǵalıevtiń aıtýynsha, bıylǵy úsh aıda tirkelgen jaraqattar sany ótken jyldyń osy merzimimen salystyrǵanda 447-ge artyq. Onyń ishinde 1109 jaǵdaımen turmystyq jaraqattar birinshi orynda tur. Ekinshi orynda 768 jaǵdaımen kóshe jaraqattary jáne odan keıin 478 jaǵdaımen mektep jaraqattary tur. Sporttyq jaraqattar sany da byltyrǵymen salystyrǵanda 389-dan 453-ke deıin ósken. Esesine, balalardyń qatysýymen bolatyn jol-kólik oqıǵalary azaıyp, 25-ten 16-ǵa tómendegen.
— Jazǵy mezgilde balalar jaraqaty ózekti máselege aınalady. Balalardy qaraýsyz qaldyrmaý — jaraqattyń aldyn alýdaǵy basty qadam. Ásirese tereze men esik ashyq kezde, úshkir nemese hımııalyq zattar úıde qoljetimdi jerlerde bolǵanda qaýip kúsheıedi. Sondyqtan barlyq ata-analardy saq bolýǵa shaqyramyz, — dedi Shyńǵys Nurǵalıev brıfıng barysynda.
Mamannyń aıtýynsha, balalarmen júıeli túrde qaýipsizdik týraly áńgimelesip otyrý, jolda júrý erejelerin túsindirý — jaraqattyń aldyn alýda mańyzdy ról atqarady.
Oblystyq kópbeıindi balalar aýrýhanasynyń shtattan tys bas ınfektsıonısi Elena Koptıaevanyń sózinshe, óńirde túrli ınfektsııanyń órshýi baıqalady.
— Bıyl rotavırýspen aýyrǵandar sany ótken jylmen salystyrǵanda 1,5 ese artty. Aýrý balalardyń dene qyzýy kóterilip, aǵzada ıntoksıkatsııa belgileri paıda bolady, ish ótý men kataraldy sımptomdar — muryn bitelýi, túshkirý, jótel túrinde kórinedi, — dedi ınfektsıonıst-dáriger.
Sonymen qatar, jaz aılarynda enterovırýstyq ınfektsııa taralý qaýpi joǵary. Bul aýrý kóbine ashyq sý qoımalary men basseınder arqyly juǵady. Osyǵan baılanysty dárigerler shomylý kezindegi qaýipsizdik sharalaryna erekshe kóńil bólýge shaqyrady.
Sońǵy úsh jylda oblys aýmaǵynda dızenterııa men salmonellez jaǵdaılary tirkelmegen. Alaıda mamandar bul aýrýlardyń aldyn alý úshin qarapaıym gıgıena talaptaryn saqtaýǵa shaqyrady.
— Dızenterııany «las qol» aýrýy dep ataıdy. Kóbine bes jasqa deıingi balalar aýyrady. Aldyn alý úshin jemis-jıdekter men kókónisterdi paıdalanbas buryn aǵyn sýmen muqııat jýý kerek, tamaq ónimderiniń saqtaý merzimine nazar aýdarý, sý qoımalarynda shomylǵanda balalardyń sýdy iship qoıýyna jol bermeý jáne qol gıgıenasyna kóńil bólý. Jalpy qarapaıym qaýipsizdik erejelerin saqtaý arqyly kóptegen qolaısyz jaǵdaılardyń aldyn alýǵa bolady. Ásirese jaz aılarynda balalardyń ómiri men densaýlyǵyna beı-jaı qaramaý asa mańyzdy, — dedi Elena Koptıaeva.
Buǵan deıin Petropavlda er adamnyń ústine benzın tógilip, tirideı janyp kete jazdaǵanyn jazǵan edik.