SQO-da balalar jazǵy demalysty etnoaýyl lagerinde ótkizedi

PETROPAVL. QazAqparat – Soltústik Qazaqstan oblysyndaǵy Aqqaıyń aýdanynda «Sarjaılaý» atty etnoaýyl saýyqtyrý lageri jumysyn bastady, dep habarlaıdy QazAqparat tilshisi.

«Sarjaılaý» etnoaýyly SQO Aqqaıyń aýdanyndaǵy № 3 Smırnov orta mektebiniń janynan ashyldy. Aýmaqqa kıiz úı qurylyp, qazan-oshaq ornatyldy, altybaqan quryldy. Jaz ýaqytynda bul jerde 210 bala tegin dem alady.

«Sarjaılaý» etnoaýyl saýyqtyrý lageri «Rýhanı jańǵyrý» baǵdarlamasy aıasynda ashyldy. Maqsat – balalardyń demalysyn qyzyqty, ári paıdaly etip uıymdastyrý. Ata-babamyzdan qalǵan salt-dástúrdi dáriptep, nasıhattamaqshymyz. Balalarǵa, oqýshylarǵa umyt bola bastaǵan dástúrlerdi úıretemiz, kórsetemiz. Bul jerde bizdiń mekteptiń ǵana emes, basqa da oqý ordalarynyń balalary kelip, demalysyn ótkizedi», - deıdi mektep dırektory Raısa Nurtazınova.

Etnoaýyldaǵy ár kún josparlanǵan. Búgin qyzdar jaǵy nan ılep, baýyrsaq pisirýdi úırendi. Daladaǵy oshaqqa pisken sary baýyrsaqty etnoaýyldyń ashylý saltanatyna kelgen qonaqtarǵa usyndy. Sondaı-aq oqýshylar bul jerde jún tútý, alasha toqý, qamshy órý sekildi qol ónerimen tanysady. Besasyq, asyq atý, saqına tastaý, sıqyrly taıaq sekildi ulttyq oıyndar oınap, qazaqtyń aýyz ádebıetimen tanysady.

Etnoaýyl jaz boıy jumys istep, oqýshylardy 4 kezeńmen qabyldamaq.