SQO-da balalar órt sóndirý bólimshesiniń jumysymen tanysyp, mýzeıdi aralady
PETROPAVL. QazAqparat – Petropavlda túzetý mektebiniń oqýshylary balalardy qorǵaý kúni qarsańynda órt sóndirý bólimshesinde bolyp, órt qaýipsizdigi erejelerimen tanysty, dep habarlaıdy QazAqparat tilshisi.
Soltústik Qazaqstan oblysy tótenshe jaǵdaılar departamenti baspasóz qyzmetiniń málimetinshe, múmkindigi shekteýli balalarǵa arnalǵan Petropavldaǵy № 2 túzetý mektep-ınternatynyń 15 oqýshysy oblys ortalyǵyndaǵy № 1 mamandandyrylǵan órt sóndirý bólimshesine ekskýrsııaǵa bardy.
«Bizdiń maqsatymyz – balalarǵa tótenshe jaǵdaı uǵymyn túsindirý, odan keler qaýipti túsindirip tótenshe jaǵdaı bolǵanda qaıda, qandaı telefon nómirine habarlasýǵa bolatynyn jetkizý. Sondaı-aq órt qaýipsizdigi erejeleri týraly aıttyq. Órttiń neden shyǵatynyn, otpen oınaýdyń saldary qandaı bolatynyn arnaıy túsirilgen beınerolıkter arqyly kórsettik», - deıdi órt sóndirý bólimshesiniń basshysy Bolat Jumajanov.
Balalar sondaı-aq órtke qarsy qyzmettiń murajaıynda bolyp, qyzyqty jádigerlermen tanysty. Mýzeı 1980 jyldary qurylǵan. Munda órt sóndirý qyzmetiniń tarıhymen tanysyp, qazirgi órt sóndirýshilerdiń jumysy jaıynda maǵlumat alýǵa bolady.
Oqýshylar mýzeıdegi jádigerlerdi qyzyǵa tamashalap, kóne órt sóndirý quraldarymen tanysyp, basqa adamnyń ómirin qutqarý barysynda qaza tapqan batyr órt sóndirýshiler jaıynda bildi.
Órt sóndirý bólimshesin aralap, tehnıkany, arnaıy quraldardy kórdi, órt sóndirýshilerdiń kıimderin kıip, sýretke túsýge múmkindik aldy.
«Petropavldyń oqý oryndary bizdiń bólimshedegi mýzeıdi kelip kórýge, ekskýrsııa uıymdastyrýǵa únemi ruqsat surap jatady. Biz, árıne, balalardy qarsy alyp, olarǵa bizdiń jumysymyz jaıynda aıtýǵa, tehnıkamyzdy, kıim-keshegimizdi kórsetýge qarsy emespiz. Órt sóndirýshiler arasynda erlik jasaǵan áriptesterimiz az emes, biz olardy jasóspirimderge úlgi etemiz. Órt qaýipsizdigi erejelerin eske salamyz», - deıdi Bolat Jumajanov.
