SQO-da balalar etnoaýyldarda demalady

PETROPAVL. QazAqparat – Soltústik Qazaqstan oblysynda balalar erekshe lagerlerde demalady. Ulttyq salt-dástúrdi nasıhattaǵan etnoaýyldar ázirge eki aýdan ortalyǵynda ashyldy, dep habarlaıdy QazAqparat tilshisi.

SQO bilim basqarmasy baspasóz qyzmetiniń málimetinshe, balalardyń demalysyna arnalǵan etnolager - Qyzyljar óńiriniń biregeı jobasy. Úsh jyl buryn alǵash ret Jambyl aýdanynda iske qosylǵan etnoaýyl endi óńirdiń basqa eldi mekenderinde de ashylyp jatyr.

«Ádettegi lager korpýstarynyń ornyna balalar ulttyq naqyshta bezendirilgen kıiz úılerde demalady. Munda ulttyq oıyndar oınatylady. Altybaqan da quryldy. Ájeler qyzdarǵa nan ılep, baýyrsaq pisirýdi úıretse, uldar aǵash jońqalap, samaýyr qoıýdy meńgeredi. Balalar demalys barysynda ulttyq dástúrlermen tanysyp, olarǵa keı rásimder kórsetiledi», - deıdi basqarmanyń baspasóz hatshysy Ásel Orazbaeva.

Shaǵyn etnoaýylda balalar jylqyny kútip baptaýdyń qyr-syryna qanyǵady, erttep minýdi úırenedi. Jalpy demalyp jatqan balalardy jalyqtyrmaý úshin ár kúnniń ózindik baǵdarlamasy bar.

Máselen Ǵ.Músirepov atyndaǵy aýdannyń ortalyǵy Novoıshımka eldi mekeninde «Týǵan ólke» etnolıngvıstıkalyq lageri №1 orta mekteptiń janynan ashyldy. Bes kún jumys isteıtin etnoaýyl shamamen 1,5 myńnan artyq balany qamtymaq. Uıymdastyrýshylardyń aıtýynsha, saltanatty ashylýyna oraı kontserttik baǵdarlama qoıylyp, balalar arasynda ulttyq sporttyq oıyndar oınatyldy. Al túski asta demalýshylar ulttyq taǵamdardan dám tatty.

Buǵan deıin SQO-da bıyl 20 myńnan astam balanyń jazǵy saýyqtyrý lagerimen qamtylatynyn aıtqan edik.