SQO-da balalar bólimshesi jańa ınfektsııalyq aýrýhanaǵa kóshiriledi

PETROPAVL. QazAqparat – Soltústik Qazaqstan oblysynda byltyr ashylǵan ınfektsııalyq aýrýhanaǵa balalar bólimshesi tolyq kóshiriletin boldy, dep habarlaıdy QazAqparat tilshisi.

SQO ákimi Qumar Aqsaqalovtyń aıtýynsha, bıyl oblystyq kópbeıindi balalar aýrýhanasyn kúrdeli jóndeýge 134 mln teńge bólinbek. Jaqynda kompıýterlik tomograf alyndy. Qazir ornatylyp jatyr, eki apta shamasynda zamanaýı qondyrǵy qoldanysqa beriledi.

«Medıtsınaǵa qarajat bólinip jatyr. Bul da az, biraq osylaısha birtindep másele sheshimin tabady dep oılaımyn. Ata-analar balalarǵa arnalǵan ınfektsııalyq aýrýhana ǵımaratyna qatysty narazylyq, ótinishterin jıi aıtady. Ol ǵımarat eskirgen. Sondyqtan qazir koronavırýsqa qatysty jaǵdaı birshama turaqtalysymen-aq biz bul balalar bólimshesin byltyr ashylǵan ınfektsııalyq aýrýhanaǵa kóshiremiz. Ol aýrýhana 200 orynǵa arnalǵan. Onyń jartysyn biz balalar bólimshesine bere alamyz. Nysan barlyq qajetti jabdyqtarmen qamtylǵan. Sondyqtan bul másele de sheshimin tabady», - dedi óńir basshysy.

Qumar Aqsaqalovtyń aıtýynsha, 2019 jyly qurylysy bastalǵan oblystyq kópbeıindi aýrýhana bıyl jyl sońyna deıin nemese kelesi jarty jyldyqta paıdalanýǵa beriledi.

«Bul zamanaýı aýrýhana bolady. Oǵan qajettilik bar, óıtkeni, bizdiń turǵyndarymyz, ókinishke oraı, basqa óńirlerge, shetelderge sapaly medıtsınalyq kómek alý úshin barýǵa májbúr. Sondyqtan osy aýrýhana qurylysy júrip jatyr. Osy ýaqytqa deıin biraz jumys atqaryldy», - dedi SQO ákimi.