SQO-da baqtashynyń úıinen esirtki men ańshy myltyǵy tabylǵan
PETROPAVL. QazAqparat – Soltústik Qazaqstan oblysynda 61 jastaǵy baqtashy keptirilgen qarasorany jáne ańshy myltyǵyn úıinde saqtaǵan, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, oblys aýmaǵynda «Ýchaske» jedel-profılaktıkalyq is-sharasy ótip jatyr. Aýdandyq jáne qalalyq ýchaskelik polıtsııa ınspektorlary turǵylyqty jerleri boıynsha barlyq esepte turǵan tulǵalardy tekserýdi josparlaǵan.
Osyndaı reıdterdiń birinde Taıynsha aýdany polıtsııa bólimi Kellerovkanyń ýchaskelik polıtsııa ınspektory Vıktor Pshenıchnyı jáne Taıynsha aýdany polıtsııa bóliminiń jedel ýákili Oljas Baltabaı Lıpovka aýylyna barady. Buryn esirtkige qatysty qylmys jasaǵany úshin jaýapqa tartylǵan, polıtsııanyń esebinde turǵan er adamdy teksergen. 61 jastaǵy baqtashynyń úıinen eki túıinshek, úsh sirińke qoraby, ósimdik sabaqtary, jarty stakan erekshe ıisi bar ósimdik zaty, sondaı-aq ystalǵan plastık bótelke tabyldy. Sondaı-aq, ol «IJ-27» markaly ańshy myltyǵyn jáne 16 kalıbrli patrondardy zańsyz saqtap kelgen.
«Er adam jaqynda Lıpovka eldi mekeninde baqtashy bolyp jumysqa ornalasqan. Jabaıy qarasorany ózi paıdalaný úshin jınap, keptiripti. Esirtki zaty men myltyq alynyp, sot-hımııalyq, ballıstıkalyq saraptamalarǵa jiberildi. Tergeý júrgizilýde», - dedi Taıynsha aýdany polıtsııa bóliminiń bastyǵy Nurlyjan Aqtanov.
Jyl basynan SQO polıtseıleri zańsyz aınalymnan 400 kg astam túrli esirtki zatyn tárkiledi. Onyń 350 kg astamy marıhýana, 1kg 690 g -sıntetıkalyq esirtki, sondaı-aq 372 g - geroın.
Al «Ýchaske» is-sharasy aıasynda polıtseıler 180 myńnan astam tekseris júrgizip, 9 myńnan astam túrli quqyq buzýshylyqty anyqtady.
