SQO-da baǵaly shaıandy zańsyz aýlady degen kúdikpen 9 adam ustaldy
SQO polıtsııa departamenti baspasóz qyzmetiniń málimetinshe, Jambyl aýdany polıtsııa bóliminiń qyzmetkerleri baǵaly tabıǵı resýrs – shaıantárizdes jándik Artemia salina-ny zańsyz aýlaýdyń jolyn kesti.
«Astyq» jedel-profılaktıkalyq is-sharasy aıasynda jumys istep jatqan mobıldi top Senjarka aýyly mańyndaǵy tuzdy kólge jaqyn jerde tekserý úshin «Audi», «Lexus» jáne «GAZel» avtokólikterin toqtatqan. «GAZel» kóliginde quramynda Artemia salina shaıandarynyń tsıstalary bolýy múmkin qum tıelgen 40 qap anyqtaldy, jol talǵamaıtyn kólikten taǵy 10 qap alyndy. Osylaısha Artemia salina-ny zańsyz aýlady degen kúdikpen oblys ortalyǵynyń jáne SQO aýdandarynyń 9 turǵyny ustaldy. Olarda baǵaly jándikti óndirýge quqyq beretin qujat bolmady.
Atalǵan fakti QR Qylmystyq kodeksiniń 335-baby 3-bóligi «Balyq resýrstaryn, basqa da sý janýarlaryn nemese ósimdikterin zańsyz alý» boıynsha tergep-tekserýlerdiń biryńǵaı tizilimine engizildi. Avtokólikter arnaıy turaqqa qoıyldy.
«Bolǵan oqıǵanyń mán-jaıyn anyqtaýǵa baǵyttalǵan sotqa deıingi tergeý júrgizilip jatyr. Qajetti saraptamalardy ótkizgennen keıin óńirdiń tabıǵatyna keltirilgen shyǵyn kólemi belgili bolady.
Artemia salina shaıanyn farmatsevtıka jáne kosmetologııa salasynda qoldanady, «qara naryqta» suranysqa ıe. Ádette, shyǵyn kólemi mıllıondaǵan teńgeni quraıdy. Baǵaly shaıandy zańsyz aýlaýdyń bul bıylǵy alǵashqy jaǵdaıy», - deıdi Jambyl aýdany polıtsııa bóliminiń bastyǵy Asan Meıramov.
