SQO-da azyq-túliktiń qaı túrleri qymbattady

PETROPAVL. QAZINFORM - Soltústik Qazaqstan oblysynda qazan aıyndaǵy eń tómengi kúnkóris jáne ınflıatsııa deńgeıi belgili boldy, dep habarlaıdy QazAqparat.

Statıstıka departamentiniń málimetinshe, qazan aıynda eń tómengi kúnkóris deńgeıi 27 354 teńgeni kórsetken. Bul kórsetkish ótken jyldyń jeltoqsan aıymen salystyrǵanda 18%-ǵa joǵary. Shyǵyndardyń basym bóligin et pen balyq, sút jáne jumyrtqa, jemis pen kókóniske ketken qarajat quraıdy.

Azyq-túlikke jatpaıtyn taýarlar men aqyly qyzmetterdiń quny 12 309 teńgeni quraǵan.

«Qazan aıynda Soltústik Qazaqstan oblysyndaǵy ınflıatsııa deńgeıi 0,5% qurady. Ótken aıda azyq-túlik taýarlary 0,4%-ǵa, azyq-túlik emes taýarlar - 0,8%-ǵa, aqyly qyzmetter - 0,4%-ǵa qymbattaǵan», - delingen statıstıka departamentiniń habarlamasynda. 

Atalmysh aımaqta nan, jumyrtqa, qant, maı, un, dándi daqyldar, makaron ónimderi, kondıterlik taǵamdar, et, alkogoldi jáne alkogolsiz sýsyndardyń baǵasy kóterildi. Statıstıka departamentiniń aıtýynsha, jemister, kókónister, balyq jáne teńiz ónimderiniń baǵasy, kerisinshe, arzandaǵan.   

Soltústikqazaqstandyqtarǵa búgingi kúni qurylys materıaldary, kıim-keshek pen aıaq kıim, turmystyq tehnıka baǵasy qymbatqa túsip tur. Qonaq úıler men meıramhanalarda qyzmet kórsetý baǵalary qymbattaǵan, oıyn-saýyq oryndary men túrli agenttikterdiń baǵalary da eselengen.

Baǵalardyń kóterilýi shamamen 0,1-7,2% kóleminde. Qalaı bolǵan kúnde de, taýarlar men qyzmetterdiń qymbattaýy jalaqysy eń tómen aımaqtardyń qataryna kiretin Soltústik Qazaqstan oblysy turǵyndarynyń otbasylyq bıýdjetine keri áserin tıgizbeı qoımaıdy.