SQO-da azyq-túlik tıelgen júk kóligi aýdaryldy
PETROPAVL. QazAqparat – Soltústik Qazaqstan oblysynda azyq-túlik artylǵan júk kóligi qolaısyz aýa raıynan jol jıegine shyǵyp ketip, aýdaryldy, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, «Foton» júk kóligi Shal aqyn aýdany Sergeevka qalasyndaǵy dúkenderge azyq-túlik apara
jatqan. Júrgizýshi qalyń jaýǵan qardan joldy baıqaı almaı, jıekke shyǵyp ketken. Júk kóligi bir jaǵyna aýdaryldy. Kólikte ekspedıtor men saýda ókili bolǵan. Eshkim zardap shekken joq.
Patrýldik polıtsııa ekıpajy aýdarylǵan júk kóligin shyǵaryp alý úshin jergilikti «Stımýl» JShS kómekke júgingen. JShS basshysy bolsa, bul joly da qar tazalaıtyn tehnıkany, júk tıegishti jáne tartqyshty jibergen.
«Foton»-dy jol jıeginen shyǵarý úshin ony aldymen júkten bosatýǵa týra keldi. Júk kóliginiń júrgizýshisi alǵysyn bildirip, jolyn jalǵady.
Al Taıynsha aýdanynda polıtseıler Kókshetaýdan Túmenge bara jatyp, jol jıegine shyǵyp ketken «DAF» aýyr júk kóligin shyǵarýǵa kómektesti.
«Patrýldik polıtsııanyń negizgi mindeti – jolda qalǵan júrgizýshilerge kómektesý. Óńirdiń aýa raıy qubylmaly. Sol sebepti jolda asa saq bolýǵa, jol qozǵalysy erejelerin qatań saqtaýǵa shaqyramyz. Joldardyń jabylǵany jáne aýa raıynyń qolaısyzdyǵy týraly eskertpelerge beıjaı qaramaý qajet», - deıdi SQO Polıtsııa departamenti patrýldik polıtsııa batalonynyń komandıri Erlan Mádıev.
Al 10 naýryz kúni «Chelıabi-Novosibir» jolynyń 601 shaqyrymynda jedel járdem kóligi toqtap qalǵan. M.Jumabaev aýdany Pısarevskıı aýyldyq okrýginiń feldsheri men kólik júrgizýshisi naýqasty Petropavlǵa jetkizip, qaıtyp kele jatqan kezde kóliktiń ballonyndaǵy gaz taýsylǵan ári benzın qurylǵysy isten shyǵyp, qosylmaı qalǵan. Jolda qalǵan olarǵa patrýldi polıtseıler kómekke keldi. Jedel járdemdi tirkep alyp, 18 km jerde ornalasqan gaz quıatyn beketke súırep apardy.
