SQO-da azyq-túlik baǵasy qymbattady
PETROPAVL. QazAqparat – Soltústik Qazaqstan oblysynda statıstıka departamenti ótken toǵyz aıdaǵy ınflıatsııa boıynsha málimet berip, qyrkúıek aıyndaǵy kúnkóristiń eń tómen deńgeıiniń shamasyn eseptedi, dep habarlaıdy QazAqparat tilshisi.
SQO statıstıka departamentiniń aqparynsha, qyrkúıek aıyndaǵy kúnkóris mınımýmy 30 myń 085 teńgeni qurady. Tutyný qorjyny jyl basynan 22% artqan. Shyǵynnyń úlken bóligi et pen balyqty alýǵa, sút ónimderi men jumyrtqaǵa, kókónis pen jemis-jıdekke tıesili eken.
Sońǵy toǵyz aıda ınflıatsııa 3,5% jetken. Un, kúrish, nan-toqash jáne unnan pisiriletin kondıterlik taǵamdardyń, makaronnyń, jarma men jumyrtqanyń, balyq, sút ónimderi, et pen jemis-jıdektiń baǵasy ósti. Sonyń ishinde banan birden 22% qymbattady.
Apelsın men júzim azdap arzandady. Sonymen birge maýsymdyq kókónister – qııar, qyzanaq, burysh pen qyzylsha baǵasy tómendedi. Al sábiz, kartop, pııaz ben qyryqqabat kerisinshe 15% pen 26% aralyǵynda qymbattady.
Qymbattaǵan taýarlardyń ishinde kantselıarııa, qurylys materıaldary, kıim-keshek pen aıaq kıim, jýýǵa arnalǵan zattar men dári-dármek bar.
Sondaı-aq, soltústikqazaqstandyqtar jalǵa beriletin páter úshin, demalys oryndarynda kóńil kóterýge jáne sán salondarynda ádettegiden kóbirek aqsha tóleıtin bolady.
