SQO-da Azııa chempıonatynyń jeńimpazdary men júldegerleri marapattaldy
PETROPAVL. QazAqparat - Soltústik Qazaqstan oblysynyń ákimi Qumar Aqsaqalov Azııa chempıonatynyń jeńimpazdarymen jáne júldegerlerimen kezdesip, olardy abyroıly óner kórsetýlerimen quttyqtady, dep habarlaıdy QazAqparat tilshisi.
SQO ákimi baspasóz qyzmetiniń habarlaýynsha, Qumar Aqsaqalov sportshylarǵa jáne bapkerlerine qurmet gramotalaryn, alǵys hattar men aqshalaı syıaqylar tabys etti.
Qytaıdyń Sıan qalasynda ótken Azııa chempıonatynda erkin kúres sheberi Nurqoja Qaıpanov altyn júldeni jeńip aldy. 70 keli salmaqta kúresetin balýan aqtyq synda japondyq Kodjıra Shıgýmen kezdesip, 9:0 esebimen jeńiske jetti. 20 jastaǵy sportshy el kúresi tarıhyndaǵy eń jas chempıon atandy.
Soltústikqazaqstandyq velosportshylar úzdik ekendikterin taǵy bir dáleldedi. Jandos Bıjigitov pen Artem Zaharov toptyq jarysta bıik tuǵyrdan kórindi. Olar Tashkent qalasynda ótken dodada aldaryna jan salmady. Natalıa Saıfýtdınova men Mahabbat Úmitjanova kúmis júlde aldy. Alına Sarkýlova toptyq velojarysta «qolaǵa» ıe boldy. Jeńil atletter Margarıta Muqasheva men Mıhaıl Lıtvın júgirýden qola júlde alyp, Álem chempıonatynyń normatıvin oryndady.
«Bizdiń sportshylarymyz jyl saıyn jeńisterin eselep, jaqsy kórsetkishke qol jetkizýde. Sporttyq nysandardyń materıaldyq-tehnıkalyq bazasyn jaqsartý óz nátıjesin berip jatyr. Biz bolashaqta da talantty sportshylarǵa kásibı turǵyda ósý úshin bar jaǵdaıdy jasaımyz. Kúzde daryndy balalarǵa arnalǵan sport kolledji ashylady. Bul qadam óńirdegi sportty damytýǵa úlken serpilis beredi. Oǵan qosa, ózimizdiń sporttyq kadrlardy daıyndaý da mańyzdy is ekenin atap ótkim keledi», - dedi Qumar Aqsaqalov.
