SQO-da azyq-túlikti negizsiz qymbattatqan 126 kásipker jazalandy

PETROPAVL. KAZINFORM - Soltústik Qazaqstan oblysynda áleýmettik mańyzy bar azyq-túlik taýarlaryna belgilengen shekti saýda ústemesin asyrǵan 126 kásipker jazalandy.

v
Foto: Memlekettik kirister komıteti

SQO boıynsha Saýda jáne tutynýshylardyń quqyqtaryn qorǵaý departamentiniń málimetinshe, bıylǵy on aıda saýda salasyndaǵy zańbuzýshylyqtar úshin jaýapqa tartylǵan kásipkerlik sýbektileriniń jalpy sany 135-ke jetti.

Zańbuzýshylyqtar birinshi surypty bıdaı uny, kúrish, qaraqumyq jarmasy, taýyqtyń san eti, sary maı, kúnbaǵys maıy men kókónisterdi satý kezinde anyqtalǵan.

- Qazaqstan zańnamasyna sáıkes, áleýmettik mańyzy bar azyq-túlik taýarlaryn satýdaǵy saýda ústemesi 15% aspaýǵa tıis. Alaıda júrgizilgen tekserýler kezinde birqatar kásipkerdiń bul talapty saqtamaǵany anyqtaldy. Bıyl 19 qazannan bastap ishki saýda qaǵıdalaryna ózgeris engizildi. Endi áleýmettik mańyzy bar azyq-túlik ónimderin tasymaldaýǵa naqty jumsalǵan shyǵyndar qujatpen rastalǵan jaǵdaıda, olardy saýda ústemesine qosýǵa ruqsat etiledi. Al taýardy ótkizýge baılanysty basqa shyǵyndar belgilengen ústeme sheginde eskerilýi kerek, - deıdi departament basshysynyń orynbasary Ǵalymjan Abaev.

Talapty buzǵandarǵa aıyppul qarastyrylǵan. Onyń mólsheri kásipkerlik sýbektisiniń sanatyna qaraı 5-150 aılyq eseptik kórsetkishke deıin jetedi. Eger quqyqbuzýshylyq ákimshilik jaza qoldanylǵannan keıin bir jyl ishinde qaıtalansa, aıyppul mólsheri 10-300 AEK-ke deıin ósedi.

- Taýar baǵasynyń qaı kezeńde ósetinin anyqtaý úshin oblys ákimdigi janynda deldaldyq shemalardy tergep-tekserý jónindegi óńirlik komıssııa jumys isteıdi. Komıssııa jumysyna jergilikti atqarýshy organdardyń, Saýda jáne tutynýshylardyń quqyqtaryn qorǵaý departamentiniń, memlekettik kirister jáne ekonomıkalyq tergep-tekserý organdarynyń, sondaı-aq Básekelestikti qorǵaý jáne damytý agenttiginiń aýmaqtyq departamentiniń ókilderi qatysady. Nátıjesinde, úsh iri saýda jelisi, 15 kóterme jetkizýshi jáne úı mańyndaǵy dúkender ákimshilik jaýaptylyqqa tartyldy, - deıdi Ǵalymjan Abaev.

Buǵan deıin Almatyda azyq-túlik baǵasyn negizsiz kótergen kásipkerlerge 80 mln teńgeden astam aıyppul salynǵanyn jazǵan edik.