SQO-da azyq-túlik baǵasyn negizsiz ósirýdiń 50 deregi anyqtaldy
PETROPAVL. KAZINFORM — Soltústik Qazaqstan oblysynda áleýmettik mańyzy bar azyq-túlik taýarlaryn negizsiz qymbattatqan kásipkerlerge bıyl 3,8 mln teńge aıyppul salyndy.
SQO boıynsha saýda jáne tutynýshylardyń quqyqtaryn qorǵaý departamentiniń málimetinshe, azyq-túlik baǵasyn negizsiz ósirgen kásipkerlerdiń 18-i jyl ishinde qaıtalap zań buzǵan. Zańnamaǵa sáıkes talaptardy qaıta buzǵan jaǵdaıda jaza mólsheri edáýir ulǵaıady.
— Qazaqstanda áleýmettik mańyzy bar azyq-túlik taýarlarynyń baǵasyn turaqtandyrý jáne tutynýshylardyń quqyqtaryn qorǵaý maqsatynda saýda salasyna qoıylatyn talaptar kúsheıtilgen. Qoldanystaǵy zańnamaǵa sáıkes áleýmettik mańyzy bar azyq-túlik taýarlaryn ótkizetin saýda sýbektileri óndirýshiniń baǵasyna nemese kóterme jetkizýshiden satyp alynǵan baǵaǵa 15% artyq saýda ústemesin qosa almaıdy. Bul talap halyq kúndelikti tutynatyn negizgi azyq-túlik ónimderiniń qoljetimdiligin qamtamasyz etýge baǵyttalǵan, — deıdi departament basshysy Ǵalymjan Ilıasov.
Búginde áleýmettik mańyzy bar azyq-túlik taýarlarynyń tizbesine 31 ataý engizilgen. Bul sanattaǵy ónimderdi satý kezinde kásipkerler belgilengen saýda ústemesin saqtap qana qoımaı, olardyń satyp alynǵan baǵasyn rastaıtyn barlyq qujattardy usynýǵa mindetti. Olardyń qatarynda jetkizý sharttary, shot-faktýralar, júkqujattar jáne óndirýshiniń nemese jetkizýshiniń bosatý baǵasyn rastaıtyn qujattar bolýy tıis.
Áleýmettik mańyzy bar azyq-túlik taýarlarynyń baǵasyn qalyptastyrý kezinde tasymaldaý, saqtaý, ımporttaý shyǵyndaryn, jasyryn komıssııalardy, kredıt pen saqtandyrý rásimdeý shyǵyndaryn saýda ústemesine engizýge tyıym salynǵan.
— Saýda oryndary taýar baǵasyn ulttyq valıýta — teńgemen kórsetýge mindetti. Taýardy kórsetilgen baǵadan joǵary satýǵa da jol berilmeıdi. Mundaı faktiler anyqtalǵan jaǵdaıda da ákimshilik jaýapkershilik kózdelgen. Zańnama saýda jelileri men iri saýda nysandarynyń ónim berýshilermen qarym-qatynasyn da retteıdi. Máselen saýda jelilerine taýardy saýda nysandaryna kirgizýden negizsiz bas tartýǵa tyıym salynǵan. Bul talaptar otandyq óndirýshilerdiń ónimderin naryqqa erkin shyǵarýǵa jáne ádil básekelestik ortany qalyptastyrýǵa baǵyttalǵan, — deıdi Ǵalymjan Ilıasov.
Eger turǵyndar saýda zańnamasy talaptarynyń buzylǵanyn baıqasa, olar «e-Ótinish» júıesi arqyly ýákiletti organǵa júgine alady. Ótinishpen birge chek, foto nemese beınematerıal sekildi dáleldemeler usynylýy qajet.
Buǵan deıin «Altyn Orda» bazarynda azyq-túlik baǵasyn negizsiz kótergen 7 deldaldyń jumysy toqtatylǵanyn jazǵan edik.
