SQO-da ájeler forýmy ótti
PETROPAVL. QazAqparat – Petropavlda otbasy qundylyqtaryn ulyqtaý maqsatynda alǵash ret ájeler forýmy ótti, dep habarlaıdy QazAqparat tilshisi.
Ájeler forýmy Petropavldaǵy analar mektebiniń uıymdastyrdy. Oǵan oblys ortalyǵyndaǵy qazaq mektepteriniń 6 – 11 synyptarynda oqıtyn oqýshy qyzdary qatysty.
«Bul jıyndy ótkizýdegi basty maqsat - urpaqtar sabaqtastyǵyn saqtaı otyra ulttyq baılyǵymyz salt-dástúrdi, ádet-ǵurpymyzdy jastardyń boıyna sińirý», - deıdi uıymdastyrýshylar.
Іs-sharaǵa «Qyzyljar» ortalyq meshiti janynan qurylǵan ájeler mektebiniń ókilderi, oblysqa tanymal «Balqadısha» halyqtyq ájeler ansambliniń músheleri keldi. Aralaryndaǵy eń úlkeni Sapýra Ámireqyzynyń jasy búginde 88-ge kelgen. Keıýana – ájeler mektebiniń belsendi múshesi. Oqý oryndary, mádenı-aǵartý mekemeleri uıymdastyratyn túrli kezdesýlerden qalmaı, jastarǵa, sonyń ishinde qyzdarǵa ónege beretin aqyl-keńesin aıtyp otyrady.
«Búgin kezdesýge kelip, qýanyp turmyn. Qyzdarymyz ulttyq kóılek-beshpentimizdi kıip, shashtaryn ádemilep órip kelipti. Qandaı jarasyp tur. Buryn bizdiń qazaǵymyzdyń toı-dýmany osylaı ótetin», - deıdi Sapýra áje.
Forým barysynda ájeler sóz aldy, jas qyzdarǵa aqyl salarlyq ósıetterin jetkizdi. Keıin aq dastarqan basyna jaıǵasyp, óńir ónerpazdarynyń kontsertin tamashalady.
«Bul jerge ájeler mektebiniń, analar mektebiniń jáne qyzdar klýbynyń múshelerin jınadyq. Sondaı-aq oblys ortalyǵyndaǵy qazaq mektepteriniń oqýshy qyzdary shaqyrdyq. Bala tárbıesinde ájelerdiń alar orny zor, ony biz umytpaýymyz kerek. Ájelerdi ulyqtasaq, qurmet kórsetsek, solarǵa eliktesek, bolashaqta aq jaýlyqty analarymyzdyń jolyn jalǵaı alatyndaı bolsaq degen nıetimiz bar», - deıdi analar mektebiniń múshesi Záýresh Jıentaeva.
Alǵash uıymdastyrylǵan ájeler forýmy bolashaqta dástúrli túrde ótkizilip turmaqshy.
