SQO-da Aıyrtaý aýdany karantınge jabylyp, kirip-shyǵýǵa tyıym salyndy

PETROPAVL. QazAqparat – Soltústik Qazaqstan oblysyndaǵy Aıyrtaý aýdany qaýipti indetti juqtyrǵandardyń tirkelýine baılanysty karantınge jabyldy, dep habarlaıdy QazAqparat tilshisi.

Aýdandyq shuǵyl shtabtyń málimetinshe, Aıyrtaý aýdany bas sanıtar dárigeriniń qaýlysyna sáıkes 18 maýsym saǵat 00.00-den bastap karantın sharalary kúsheıtiledi. Aýdannyń shekarasy boıynsha blokpostar qoıylyp, aýdanǵa kirip-shyǵý shekteledi.

Koronavırýs ınfektsııasynyń taralýyna toqtaý salý maqsatynda týrıstik demalys oryndarynyń jumysy toqtamaq. Kórshi-qolańǵa, týystarǵa úı-úıdi aralaýǵa jáne otbasylyq is-sharalardy ótkizýge tyıym salynady. Alaıda kóshege erkin shyǵýǵa ruqsat etiledi, biraq eki jáne odan kóp adam birge serýendegende qashyqtyqty saqtap, maska kııý mindetteledi.

Mamandardyń aıtýynsha, merekelik, sport, oıyn-saýyq mádenı-buqaralyq is-sharalardy ótkizýge tyıym salynǵan. Sondaı-aq jaǵdaı túzelgenshe kompıýterlik klýbtardyń, balalardyń saýyqtyrý lagerleriniń, mektep janyndaǵy lagerlerdiń, karaoke, bılıard, fıtnes jáne jattyǵý zaldarynyń qyzmeti toqtatylady.

Qoǵamdyq tamaqtaný nysandary saǵat 10.00-den 22.00-ge deıin, al saýda oryndary saǵat 20.00-ge deıin ǵana jumys istemek.

Mamandar turǵyndardy qalyptasqan jaǵdaıǵa túsinistikpen jáne jaýapkershilikpen qarap, maska men dezınfektsııalaý quraldaryn paıdalanýdy suraıdy.

Jalpy SQO-da 16 maýsymdaǵy jaǵdaı̆ boı̆ynsha koronavırýs ınfektsııasymen 125 adam tirkelgen, onyń 51-i emdelip shyqty.