SQO-da aıyna 300-den astam oftalmologııalyq ota tegin jasalady

PETROPAVL. KAZINFORM — Soltústik Qazaqstan oblysynda bir aıda syrqattarǵa 109 mln teńgeniń otasy tegin jasalǵan. 

Áleýmettik medıtsınalyq saqtandyrý qorynyń SQO boıynsha fılıalynyń málimetinshe, qazir kózge ota jasatý úshin shetel asýdyń nemese úlken qalalarǵa barýdyń qajeti joq. Búginderi kóptegen oftalmologııalyq qyzmet túri Petropavlda da qoljetimdi.

Fılıal málimetterine sáıkes, SQO-da 2026 jyldyń qańtarynda 365 patsıentke jalpy somasy 108,8 mln teńgege oftalmologııalyq operatsııalar jasaldy. Onyń 197-si jedel medıtsınalyq járdem jelisi boıynsha, al 163 ota statsıonardy almastyratyn kómek jelisi boıynsha atqaryldy. Olardyń qatarynda kózdiń buldyrlanyp kórýine ákeletin kataraktany arnaıy ádispen alyp tastaý, kóz ishindegi qysymdy tómendetýge baǵyttalǵan operatsııalar, kózdiń qabyǵy jyrtylǵan jaǵdaıda ony tigý sııaqty emdeý tásilderi bar.

Sondaı-aq, kóz burshaǵy ornynan jyljyp ketken jaǵdaıda ony alyp, ornyna jasandy lınza qoıý nemese kóz ishindegi lınzany arnaıy tásilmen bekitý sekildi joǵary tehnologııalyq operatsııalar da jasalady. Bul ádisterdiń barlyǵy naýqastardyń kórý qabiletin jaqsartýǵa jáne kóz aýrýlarynyń asqynýyn boldyrmaýǵa baǵyttalǵan.

Oftalmologııalyq kómek alý úshin syrqattyń MÁMS júıesindegi mártebesi mańyzdy. Qazirgi ýaqytta SQO-da 520 myńǵa jýyq adam tursa, sonyń 59 myńǵa jýyǵy medıtsınalyq saqtandyrylmaǵan.

Jalpy 2025 jyly oblysta MÁMS aıasynda 1 mlrd 249 mln teńge somasyna 4 057 operatsııa jasalǵan eken.

Buǵan deıin Qazaqstanda kúrdeli otalardyń 80% el ishinde jasalatyndyǵyn jazǵan edik.