SQO-da áıeliniń emi úshin 350 myń dollar urlaǵan qostanaılyq jazasyn ótep jatyr
PETROPAVL. QazAqparat – Soltústik Qazaqstan oblysyndaǵy kolonııalardyń birinde onkologııalyq aýrýmen aýyratyn áıeliniń emi úshin 350 myń AQSh dollaryn urlaǵan qostanaılyq jazasyn ótep jatyr, dep habarlaıdy QazAqparat tilshisi.
SQO boıynsha qylmystyq atqarý júıesi departamenti baspasóz qyzmetiniń málimetinshe, Qostanaı qalasynyń 56 jastaǵy turǵyny Sergeı esimdi er adam 2018 jyldyń tamyz aıynan beri Petropavldaǵy kolonııalardyń birinde otyr. Ol 2017 jyly qaterli isik aýrýymen aýyrǵan áıelin qutqarý úshin urlyqqa barady. Aqsha aıyrbastaý pýnktteriniń birine urlyqqa túsip, 350 myń AQSh dollaryn qoldy etedi. Alaıda er adam kóp uzamaı ustaldy.
Sergeıdiń aıtýynsha, áke-sheshesi qurylysshy boldy, Qostanaı qalasyndaǵy kóptegen ádemi ǵımarattardy turǵyzýǵa atsalysty. Olar únemi jumysta bolǵandyqtan Sereja jastaıynan oıyna kelgendi istedi, araq ishti, temeki shekti. Tek áskerge baryp, ómirge degen kózqarasyn ózgertip qaıtty.
«Jasym kelgesin áskerı komıssarıatqa ózim baryp, Aýǵanstanǵa soǵysqa surandym. Biraq meni teńiz flotyna jiberdi. «K-93» dep atalatyn súńgýir qaıyqta Otan aldyndaǵy boryshymdy abyroımen ótedim. Sonda sportqa degen qyzyǵýshylyǵym týdy. Teńizge shyqpaǵan kúni 10 shaqyrym júgirip, ziltemir kóteretinmin», - dep eske alady Sergeı.
1985 jyly týǵan qalasyna oralǵan jigit «Atlet» degen sport zalyn ashyp, syrttaı ınstıtýtqa oqýǵa túsedi, zaýytqa jumysqa ornalasady.
«Ol kezde «paýer-lıftıng» jańa shyǵyp jatqan sport túri. Aınalysamyn deýshiler kóp boldy. Olardyń arasynda jasóspirimder de, jastar da, qyzdar, tipti, burynǵy maskúnemder men nashaqorlar da boldy. Kópshiligi keıin sport sheberi atandy», - deıdi jazasyn óteýshi.
Zaıybynyń aýyrǵany janyna batyp, emdeý úshin qajet qomaqty somany urlaǵan burynǵy eńbegi sińgen jattyqtyrýshy qazir qylmysqa barǵanyna ókinedi. 7 jyl 2 aıǵa sottalǵan ol merziminiń 2 jyldan artyǵyn ótedi.
«Jazasyn óteýshi túrli is-sharalarǵa belsendi qatysady, basqalarǵa úlgi. Bos ýaqytyn kitaphananyń oqý zalynda ótkizedi. Sergeı Esenın – onyń súıikti aqyny. Merziminen buryn shartty túrde bosanýdan úmiti bar. Bul jerden shyqqasyn súıikti isimen, ıaǵnı, sportpen jattyqtyrý isin jalǵastyrmaqshy», - deıdi SQO boıynsha QAJD bastyǵy Rýstan Ahmetjanov.
Sergeıdiń áıeliniń jaǵdaıy qazir qanaǵattanarlyq, 3-top múgedegi. Erli-zaıyptynyń eki balasy bar. Olar «skaıp» arqyly habarlasyp turady.
