SQO-da áıelin uryp óltirgen er adam alty jylǵa sottaldy
PETROPAVL. QazAqparat – Soltústik Qazaqstan oblysynda áıelin aıaýsyz uryp, saldarynan óltirip alǵan qylmyskerge qatysty sot úkimi shyqty, dep habarlaıdy QazAqparat tilshisi.
SQO soty baspasóz qyzmetiniń málimetinshe, Esil aýdandyq sotynda Farhad Qudajanulyna qatysty qylmystyq is qaraldy.
Oqıǵa 2020 jyldyń 14 qańtarynda boldy. Tańǵy saǵat 05:30 shamasynda F.Qudajanuly óz úıinde áıelimen janjaldasyp, ony uryp-soqqan. Saldarynan jubaıy V.Sh. alǵan dene jaraqatynan sol jerde qaza tapty.
Tergeý barysynda onyń 2019 jyldyń kókteminde baqshasynan bes oq-dári taýyp alǵany jáne ony ári qaraı óz úıinde zańsyz saqtaǵany anyqtaldy.
2020 jyldyń 12 naýryzynda F.Qudajanuly óz kinásin moıyndady. QR QK eki baby boıynsha aıyptalǵan onyń isi Esil aýdandyq sotynda qaraldy.
«QR QK 106 baby 3 bóliminiń sanktsııasy 8 jyldan 12 jylǵa deıingi bas bostandyǵynan aıyrýdy qarastyrady. QR QK 287 baby 3 bóliminiń sanktsııasy 50 myń AEK mólsherinde aıyppul nemese sol kólemde túzetý jumystaryna jegý nemese bes jylǵa bas bostandyǵynan shekteý nemese sol ýaqytqa bas bostandyǵynan aıyrýdy qarastyrady.
Sotpen jazany taǵaıyndaý kezinde QR QK 55 b. 3 b. talaptary eskerildi, ıaǵnı protsestik kelisimniń barlyq sharttary oryndalǵan jaǵdaıda jasalǵan qylmystyq quqyq buzýshylyq úshin jazanyń negizgi túriniń eń joǵary merzimniń nemese mólsherdiń jartysynan asyrýǵa bolmaıdy. Ol osy Kodekstiń Erekshe bóliminiń tıisti babynda kórsetilgen», - delingen baspasóz habarlamasynda.
Nátıjesinde sot úkimimen F.Qudajanuly qylmystyq quqyq buzýshylyqtar jıyntyǵy boıynsha, onsha qatań emes jazany neǵurlym qatań jazaǵa sińirý arqyly túpkilikti 6 jylǵa bas bostandyǵynan aıyryldy. Jazasyn ol ortasha qaýipsizdik júıesiniń qylmystyq-atqarý mekemesinde óteıdi.
Jábirlenýshiniń anasyna moraldik shyǵyndaryn óteý úshin sottalǵan F.Qudajanulynan 3 mln teńge óndirilip alyndy. Sondaı-aq sottalýshydan jábirlenýshiler qoryna ótemaqy retinde 20 AEK – 53 myń teńge májbúrli túrde óndirilip alyndy.
Sot úkimi zańdy kúshine engen joq.
