SQO-da áıelimen birge bıýdjettiń 0,5 mlrd teńgesin jymqyrǵan sheneýnik sottaldy

PETROPAVL. QazAqparat – Petropavl qalalyq soty bıýdjettiń jarty mıllıardtan astam teńgesin talan-tarajǵa salǵan SQO Qarjy basqarmasy basshysynyń burynǵy orynbasary Ádilbek Qalıevke úkim shyǵardy, dep habarlaıdy QazAqparat tilshisi.

SQO soty baspasóz qyzmetiniń málimetinshe, eks-sheneýnik Ádilbek Qalıev áıeli, jeke kásipker Dınara Qalıevamen birge bıýdjettiń 574 061 240 teńgesin qaltasyna basqan.

Á.Qalıev memlekettik tapsyrys boıynsha konkýrstardy uıymdastyrýǵa jetekshilik ete otyryp, ózi basqaratyn kompanııalarmen ınjenerlik-geodezııalyq, jerge ornalastyrý, jer-kadastrlyq jumystardy oryndaýǵa kelisimge otyrǵan. Osylaısha Á.Qalıev eshqandaı konkýrs ótkizbeı-aq birneshe mln teńgeniń kelisimderin óziniń «NEW PROGRAMM», «Best ızobılnoe» JShS-larǵa berip, tıisinshe atqarylmaǵan jumystardyń aktisine qol qoıǵan, qarjyny seriktestikterdiń esepshotyna aýdarýǵa kelisim bergen.

Al jubaıy D.Qalıeva JShS atynan qajetti qujattardy resimdep, býhgalterlik, salyqtyq esep júrgizgen. Urlanǵan aqshany qolma-qol aqshaǵa aýdarǵan.

Osylaısha, erli-zaıypty 2017-2019 jyldar aralyǵynda memlekettiń jarty mıllıardtan astam teńgesin jymqyrǵan. Aqshanyń bir bóligine kásip ashyp, isterin dóńgeletken, Petropavlda elıtalyq jyljymaıtyn múlik alǵan.

Sot otyrysynda D.Qalıeva kúıeýiniń qylmystyq isinen beıhabar bolǵanyn aıtty.

Qalıevtardyń kinási Qylmystyq kodekstiń birneshe baby boıynsha dáleldenip, Petropavl qalalyq soty Ádilbek Qalıevke 8 jylǵa bas bostandyǵynan jáne ómir boıy memlekettik qyzmette isteý quqyǵynan aıyrý jazasyn kesti. Onyń jubaıy Dınara 6 jylǵa sottaldy. Erli-zaıyptynyń bar múlki tárkilendi. Al, olardyń kishkentaı eki balasynyń bolashaǵyn qorǵanshylyq jáne qamqorshylyq organ sheshetin bolady.