SQO-da áıeldiń basqarýyndaǵy kólikten 80 keli esirtki tabyldy

NUR-SULTAN. QazAqparat – Soltústik Qazaqstan óńiriniń quqyqqorǵaýshylary «Jezqazǵan-Petropavl» trassasynda áıel adamnyń kóliginen 80 keli esirtki tapty. Bul týraly QR Іshki ister mınıstrligi Esirtki bıznesine qarsy kúres departamentinen málim etti, dep habarlaıdy QazAqparat tilshisi.

«21 shildede Soltústik Qazaqstan oblysynyń esirtkige qarsy kúres polıtsııasy «Jezqazǵan-Petropavl» tas jolynda jedel-izdestirý is-sharalaryn júrgizdi. Onyń barysynda quqyqqorǵaýshylar azamatsha T.-nyń basqarýyndaǵy, salonynda jolaýshy – azamat T. otyrǵan «NISSAN» markaly avtokóligin toqtatty. Avtokólikti tekserý barysynda, bagaj bóliminde salmaǵy 80 keliden asatyn marıhýana salynǵan 4 polıetılen qap jáne salmaǵy 88 gramdyq gashısh salynǵan 4 orama tabylyp, alyndy», - delingen departamenttiń habarlamasynda.

Ustalǵan azamat T. tanysyna (róldegi áıelge) Soltústik Qazaqstan oblysynan birneshe sómkeni óz úıine aparýǵa kómektesýdi suraǵanyn aıtyp otyr.

«Qazirgi ýaqytta atalmysh fakti boıynsha QR Qylmystyq kodeksiniń 297-baby 3-bóligimen (Esirtki, psıhotroptyq zattardy, sol tektesterdi ótkizý maqsatynda zańsyz daıyndaý, qaıta óńdeý, ıemdený, saqtaý, tasymaldaý, jóneltý ne ótkizý) sotqa deıingi tergeý amaldary júrgizilip jatyr. Ustalǵan azamat ýaqytsha ustaý abaqtysyna qamaldy», - delingen habarlamada.