SQO-da áıel 30 jyl boıy esh qujatsyz turyp kelgen
PETROPAVL. QazAqparat – Soltústik Qazaqstan oblysy Qaraqoǵa eldi mekeniniń turǵyny Dıana Pıdanova 30 jyl boıy qujatsyz ómir súrgen, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, jeke qujatty alýǵa onyń týý týraly kýáliginiń joqtyǵy sebep bolǵan.
«Qujattardy resimdeýge jáne Qazaqstannyń azamaty ekenin rastaý úshin onyń ákesin anyqtaý qajet boldy. Ol úshin qymbat turatyn genetıkalyq saraptamany jasatý kerek. Oblystyq mıgratsııalyq qyzmet basqarmasynyń mamandary adam quqyqtary jónindegi halyqaralyq bıýrodan kómek surady. Uıym saraptamany jasaýǵa kómektesip, bar shyǵyndy kóterdi», - deıdi baspasóz qyzmetiniń mamandary.
Sondaı-aq Vozvyshenka eldi mekeninde turatyn zaǵıp er adam 1974 jylǵy úlgidegi pasportpen júrgen. Tıisti organdarǵa baryp, ózdiginen qujatyn jańalaýǵa onyń shamasy bolmaǵan. Polıtseıler oǵan tıisti tártip boıynsha qujatyn resimdep alýǵa kómektesti.
«Bireýleri qujattaryn joǵaltady, endi biri eski keńestik pasporttaryn aýystyrmaǵan. Aralarynda týǵannan qujat almaǵandar bar. Bárine kómektesýge tyrysamyz», - deıdi mıgratsııalyq qyzmet basqarmasynyń bólim bastyǵy Aıgúl Qunanbaeva.
Jyl basynan oblysta 3 myńǵa jýyq adam qujat alǵan.
