SQO-da aıdalada batpaqqa batqan túıe qutqaryldy
PETROPAVL. KAZINFORM — Soltústik Qazaqstan oblysynda polıtseıler men tabynshylar joǵalǵan jylqyny izdeýge shyǵyp, aıdaladan túıe men buqany da tapty.
SQO Polıtsııa departamenti baspasóz qyzmetiniń málimetinshe, Ýálıhanov aýdanynda ýchaskelik polıtsııa ınspektory men tabynshylar joǵalǵan jylqylardy izdep júrip kútpegen jaǵdaıǵa tap boldy. Qarda júrgish tehnıkamen shyqqan olar Seletiteńiz kólindegi adam aıaǵy jete bermeıtin aralǵa bardy. Alystan qarańdap kóringen mal batpaqqa batyp, shyǵa almaı qalǵan túıe eken.
— Janýar uzaq jatyp, álsirep qalypty. Sol mańaıda botasyn ertken túıe de júrdi. Batpaqtan shyǵaryp aldyq. Qazir jaıylymda júr. Iesin de anyqtadyq. Astanada turady eken, biraq ol malyn alyp ketýden bas tartty, — deıdi polıtsııa qyzmetkeri Serik Ámirbekov.
Joǵalǵan jylqylar da osy araldan tabyldy. Budan bólek, bul jerde «angýs» tuqymdy buqa da júr eken. Salynǵan tańbasyna qarap polıtsııa qyzmetkeri men tabynshylar janýardyń Pavlodar oblysynyń turǵynyna tıesili ekenin anyqtady. Buqa bir jylǵa jaqyn ýaqyt buryn joǵalyp ketken. Iesine joǵalǵan túliginiń tabylǵany týraly habarlandy. Keıin ol Ýálıhanov aýdanynyń turǵyndary men ýchaskelik ınspektorǵa alǵysyn aıtyp, janýardy alyp ketti.
SQO PD bastyǵynyń birinshi orynbasary Asqar Muhametqalıevtiń aıtýynsha, 11 naýryzdan bastap oblysta «Mal urysy» jedel-profılaktıkalyq is-sharasy ótip jatyr. Polıtsııanyń barlyq bólinisi mal urlyǵy faktileriniń jolyn kesý jáne olardy ashý boıynsha kúsheıtilgen túrde iske kirisken. Іs-sharanyń alǵashqy eki kúninde veterınarııa salasyndaǵy zańnamany buzýdyń 18 deregi jáne janýarlardyń erkin jaıylymda júrýiniń 50 faktisi anyqtaldy.
Buǵan deıin SQO-da qalyń qarda balyq aýlaýǵa shyqqan 6 adamǵa qutqarýshylar kómekteskenin jazǵan edik.